Россиялик саёҳат қилувчи ишбилармонларга тинчлик ва Wi-Fi етишмаслиги маълум бўлди

Россиялик саёҳатчи ишбилармонларнинг 60 фоиздан ортиғи ўз саёҳатларини мустақил ташкил қилади. Бу ҳақда «РИА Новости» хабар берди.

Халқаро бизнес туризми ассоциацияси буюртмасига асосан ABT-ACTE Russia интернет хизмати 1721 нафар россиялик саёҳатчи ишбилармон ўртасида сўров ўтказди. Сўров иш юзасидан сафарларни ташкиллаштиришда туризм инфратузилмасининг сифати ва ривожланиши ҳақида бўлган.

Саёҳатчиларга сафарнинг барча босқичи юзасидан саволлар берилган: аэропортларда, меҳмонхоналарда ва самолётларда хизмат кўрсатиш.

Сўров давомида сўнгги уч йил ичида хизмат ва бизнес сафарларини амалга оширувчи сўров иштирокчиларининг 62,8 фоизи сафарни мустақил ташкиллаштиришини таъкидлади. 12,3 фоиз иштирокчиларда эса сафар уларнинг компаниялари томонидан ташкил қилинади. 24,4 фоиз иштирокчиларнинг сафарлари эса баъзан ўзи, баъзан компания томонидан ташкил қилинади.

Бизнес саёҳатчиларнинг 77,3 фоизи сўнгги бир неча йил ичида ишбилармонлик сафарларида қулайлик даражаси ошганини қайд этган, иштирокчиларнинг 4,4 фоизи эса бунинг аксини билдирган.

Бизнес вакилларига сафар чоғида тинчлик, барқарор Wi-Fi ва ишлаш учун жой етишмайди. Бунда бизнес заллар хизматидан саёҳатчиларнинг фақат 27 фоизи фойдаланади.

Авиаташувчиларнинг хизмат кўрсатиш даражаси ошганини ишбилармонларнинг 71,2 фоизи таъкидлаган. Бунинг акси эса саёҳатчиларнинг 18,1 фоизи томонидан қайд этилган.