Халқ таълими вазири: 2019 йилнинг 1 январидан олий тоифали ўқитувчилар 2,5 млн сўм ойлик олади

24 август куни Халқаро пресс-клубнинг «Мактаб таълими: ислоҳотларнинг янги босқичидаги муҳим ўзгаришлар ва муаммолар таҳлили» мавзусидаги навбатдаги сессияси бўлиб ўтди. Бу ҳақда «Дарё» мухбири Севара Нишонова хабар берди.

Сессияда халқ таълими вазирлиги раҳбарияти иштирок этди ҳамда тизимни ривожлантириш юзасидан олиб борилаётган чора-тадбирлар юзасидан маълумот берилди. Шунингдек, мактаб ўқитувчиларининг ойлиги қанча бўлишига ҳам батафсил изоҳ берилди.

Ҳозирги кунда ўқитувчиларга классификациясига қараб ойлик берилади. Аниқлашимизча, юқори синф ўқитувчиларининг ойлиги бошланғич синф ўқитувчилариникига нисбатан кам экан.

Масалан, олий тоифали юқори синф ўқитувчиларининг ойлиги солиқлардан ташқари, ҳамма устама тўловлари билан 1 миллион 529 минг сўмни ташкил этади. 1 сентябрдан олий тоифали юқори синф ўқитувчиларининг ойлиги 24 фоизга оширилиб, 1 миллион 749 минг сўмни ташкил этади. 2019 йилнинг 1 январидан эса олий тоифали юқори синф ўқитувчилари 2 миллион 501 минг сўм ойлик ола бошлайди. Яъни уларнинг ойлиги ўртача 64 фоизга ошиши кутилмоқда.

Янги солиқ концепциясига кўра, ушлаб қолинадиган солиқлар камаяди ва ўқитувчиларнинг қўлига оладиган ойлиги кўтарилиши назарда тутилади.

Бошланғич синф ўқитувчилари ҳозирда 1 миллион 622 минг сўм олса, январдан уларнинг ҳам ойлиги 2,5 миллионга чиқади. Ўртача ҳисобда қўлига оладиган суммаси 54 фоизга ошиши кутилмоқда.

Умум-таълим мактабларида ойликнинг энг кўп ошиши психологларда кузатилади. Уларнинг ойлиги шу пайтгача жуда кам бўлган, аниқроғи бу кўрсаткич 626 минг сўмни ташкил этган. 2019 йилнинг 1 январидан мактаб психологларининг ойлиги 93 фоизга ошиб, 1 миллион 232 минг сўмни ташкил этади. Психологларга алоҳида эътибор қаратилмоқда. 10—11-синфда ўқийдиган ўқувчилар айни қизиққон ёшда бўлгани учун, уларга психологнинг кўмаги керак бўлади. Бироқ шу пайтгача соҳада психологларга эътибор қаратилмаган. Ойлиги паст, психолог штати жуда кам бўлган, баъзи мактабларда эса умуман бўлмаган.

Шерзод Шерматов, Халқ таълими вазири  

Халқ таълими вазири ўринбосари Отабек Назировнинг маълум қилишича, вазирлик тизимдаги муаммоларни ҳал қилишни ўқитувчилар ойлигини оширишдан бошлаган.

«Ўтган йилларда Ўзбекистонда халқ таълими вазирлиги бюджетидан ўқитувчиларнинг маошини ошириш учун 15—16 фоиз миқдорида маблағ ажратиб келинган. Бу кичкина рақам эмас. Бу 10 триллион сўм атрофида дегани. Лекин шунга қарамай биз ўзаро таҳлилллар натижасида ўқитувчиларниг ойлиги жуда кам бўлганини аниқладик. Агар ойлик масаласи ҳал этилмас экан, тизимдаги муаммоларни қандай ҳал қиламиз, деган қарорга келдик», — дейди Отабек Назиров.