Ўзбекистон—Ҳиндистон инновацион форуми тузилади
Инновацион ривожланиш вазирлиги делегацияси Ҳиндистонда сафарда бўлиб қайтди. Бу ҳақда «Дарё»га вазирлик матбуот хизмати маълум қилди.
Делегация аъзолари давлат раҳбарининг Ҳиндистонга бўлажак ташрифи доирасида икки мамлакат ҳукуматлари ўртасида илмий-техникавий, инновацион соҳаларда ҳамкорлик тўғрисидаги келишув лойиҳасини муҳокама қилди.
Илмий-техникавий, инновацион ривожланишга алоқадор вазирликлар, идоралар, тижорат ташкилотлари, ОТМлар, илмий-тадқиқот муассасалари, инновацион марказлар ва инкубаторлар вакиллари билан учрашув ва музокаралар ўтказилди.
Учрашувлар давомида илмий-техникавий, инновацион ютуқларни тижоратлаштириш жараёнини тезлаштиришга, ўзаро ҳамкорликни мустаҳкамлашга қаратилган икки томонлама ҳужжатларни тайёрлаш масалалари муҳокама қилинди. Ҳиндистон томони ўз навбатида электрон ҳукумат, телемедицина ва масофавий таълимни шакллантириш борасида ўзаро ҳамкорликни ўрнатишга қизиқиш билдирди.
Сафар натижаларига кўра, Ўзбекистон—Ҳиндистон инновацион форумини тузишга келишилди. Мазкур форум икки давлат олимлари, тадбиркорлари, инвесторлари, новаторлари ва инновацион ғоялар муаллифларини бир платформада бирлаштириши кутилмоқда. Форум тадбиркорлар ва инвесторларга истиқболли инновацион ғояларни молиялаштириш имконини беради. Кейинчалик бу форумни ўзбек-ҳинд инновация жамғармасига айлантириш мумкинлиги ҳам тилга олинди. Ҳиндистоннинг ишбилармон доиралари мазкур жамғармани шакллантириш бўйича молиявий кўмак беришга тайёр эканликларини билдирди.
Бундан ташқари, Ҳиндистон техникавий ва иқтисодий ҳамкорлик дастури доирасида илмий-тадқиқот ташкилотлари, ОТМлар мутахассислари, давлат ва хўжалик бошқаруви органларининг инновацион ривожланишга масъул бўлимлари ходимлари, хусусий бизнес вакилларида бепул хорижий стажировка ўташ имконияти ҳам пайдо бўлади. Мазкур лойиҳанинг мувофиқлаштирувчи орган сифатида Инновацион ривожланиш вазирлиги этиб тайинланиши таклиф этилди.
