Чеченистонда полиция ходимларига ҳужум қилиш ҳақидаги кўрсатма хориждан ижтимоий тармоқлар орқали берилган. Республика раҳбари Рамзан Қодиров Қурбон ҳайити куни Шали, Мескер-юрт ва Грознийда ҳуқуқ-тартибот ходимлари ҳаётига қасд юзасидан олиб борилган тезкор-қидирув ишлари бўйича ҳисоботларни тинглагандан сўнг шундай хулосага келди.
«Бу нафақат ҳуқуқ-тартибот ходимлари, балки бутун чечен халқига нисбатан фитна. Руҳияти шаклланмаган ўсмирларни оғир жиноятлар содир этишга жалб қилиш чуқур ўйланган ва мақсадли кўринишга эга. Ёлловчилар ўз олдига Россия жамиятида ҳатто ўсмирларга ҳам ишончсизлик, ҳар бир 10-12 яшар болада эҳтимолий террорчи ва ўта хавфли жиноятчини кўриш туйғулларини шакллантиришни режа қилган. Ҳеч кимга ва ҳеч қачон хизматнинг залворли юкини зиммасига олган полиция ходимлари ҳаётига қасд қилишига имкон бермайман», — деб ёзади Чеченистон раҳбари «ВКонтакте» ижтимоий тармоғидаги саҳифасида.
Эслатиб ўтамиз, байрам кунлари уюштирилган ҳужумлар оқибатида Шали шаҳрида иккита полициячи жабрланди, Грознийда ЙПХ ходимлари жароҳат олди. Жиноятчилар йўқ қилинди, улардан бири жароҳатланди ва омон қолди.
Изоҳ (0)