2019-ўқув йили бошланиши ҳамда Қурбон ҳайит байрами муносабати билан Самарқанд вилояти божхона бошқармаси «Ёшлар иттифоқи» бошланғич ташкилоти кам таъминланган, ижтимоий ҳимояга муҳтож оилаларга ташриф буюришди. Ташриф давомида мактабнинг 2—6-синфига қадам қўяётган ўқувчи ўғил-қизларга мактаб ўқув қуроллари жамланган совғалар топширилди, дея хабар бермоқда «Дарё» мухбири Фарҳод Норбўтаев.
Ёш авлодни она Ватанга муҳаббат, божхона касбига болалигидан меҳр уйғотиш, келажакда баркамол инсон бўлиб вояга етишларида уларни ҳар томонлама қўллаб-қувватлаш мақсадида ташкил этилган мазкур хайрия тадбирида дастлаб ёш божхоначилар Самарқанд тумани «Қуйи туркман» маҳалласининг Хотин-қизлар билан ишлаш мутахассиси Г.Мамаражабова билан биргаликда «Гулзор» кўчасида яшовчи 2 нафар фарзанднинг отаси, II-гуруҳ ногирони Ж.Абдухалилов хонадонига боришиб, 36-умумтаълим мактабининг 3-синф ўқувчиси Сабина Абдухалиловага ўқув қуроллари жамланган совға топширилди.
Шундан сўнг ташкилотчилар «Гулзор» кўчаси 2-уйда яшовчи 2 нафар фарзанднинг ота-онаси ногирон Рўзимуродовлар оиласига ташриф буюришди. Ҳозирда 2-синф ўқувчиси Маржона Рўзимуродовага ҳам совға берилди.
Худди шундай совғалар маҳалланинг «Навбаҳор» кўчаси 11-уйда истиқомат қилувчи С.Турсуновнинг 5-синфда таҳсил оладиган ўғли Баҳодир Сирожов ҳамда «Нарпай» кўчаси 66-уйда яшовчи 3 нафар фарзанднинг отаси, меҳнатга лаёқатсиз О.Ҳайдаровнинг 6-синфда таълим олаётган фарзанди Жонибек Исломовга ҳам берилди.
— «Бугун байрам арафасида менга божхоначи акаларимиз мактаб ўқув қуроллари жамланган совға олиб келишди. Бундан жуда ҳам хурсанд бўлдим. Бу эътибор бутун умр хотирамда қолади. Мактабда аъло баҳоларга ўқишга ваъда бериб мен ҳам келажакда ҳарбий соҳада хизмат қилишни ният қилдим», - дейди хурсандчилигидан Боҳодир Сирожов.
— «Қизим Сабина мактабда аъло баҳоларга ўқийди. У келажакда шифокор бўлмоқчи. Оиламизда шароит оғир. Унга мактаб сумкасини қандай олиб берсам экан деб ўйлаб юргандим. Бугун вилоят божхоначилари бизни хонадонимизга келиб қизимга совға беришди. Бизларни йўқлаб келганларингиз учун сизлардан миннатдорман», - дейди II-гуруҳ ногирони Ж.Абдухалилов.
Болаларнинг хурсандчилигини кўриб, ҳар қандай инсоннинг кайфияти, эртанги кунга ишончи ортиб бораверади. Ахир ана шу ёшлар бизнинг келажагимиз эмасми? Ҳозир биз катталар ёшларга қанча кўп ғамхўрлик кўрсацак, вақти келиб улар ҳам бизларга муносиб жавоб қайтарадилар.
Изоҳ (0)