2019-o‘quv yili boshlanishi hamda Qurbon hayit bayrami munosabati bilan Samarqand viloyati bojxona boshqarmasi “Yoshlar ittifoqi” boshlang‘ich tashkiloti kam ta’minlangan, ijtimoiy himoyaga muhtoj oilalarga tashrif buyurishdi. Tashrif davomida maktabning 2—6-sinfiga qadam qo‘yayotgan o‘quvchi o‘g‘il-qizlarga maktab o‘quv qurollari jamlangan sovg‘alar topshirildi, deya xabar bermoqda “Daryo” muxbiri Farhod Norbo‘tayev.
Yosh avlodni ona Vatanga muhabbat, bojxona kasbiga bolaligidan mehr uyg‘otish, kelajakda barkamol inson bo‘lib voyaga yetishlarida ularni har tomonlama qo‘llab-quvvatlash maqsadida tashkil etilgan mazkur xayriya tadbirida dastlab yosh bojxonachilar Samarqand tumani “Quyi turkman” mahallasining Xotin-qizlar bilan ishlash mutaxassisi G.Mamarajabova bilan birgalikda “Gulzor” ko‘chasida yashovchi 2 nafar farzandning otasi, II-guruh nogironi J.Abduxalilov xonadoniga borishib, 36-umumta’lim maktabining 3-sinf o‘quvchisi Sabina Abduxalilovaga o‘quv qurollari jamlangan sovg‘a topshirildi.
Shundan so‘ng tashkilotchilar “Gulzor” ko‘chasi 2-uyda yashovchi 2 nafar farzandning ota-onasi nogiron Ro‘zimurodovlar oilasiga tashrif buyurishdi. Hozirda 2-sinf o‘quvchisi Marjona Ro‘zimurodovaga ham sovg‘a berildi.
Xuddi shunday sovg‘alar mahallaning “Navbahor” ko‘chasi 11-uyda istiqomat qiluvchi S.Tursunovning 5-sinfda tahsil oladigan o‘g‘li Bahodir Sirojov hamda “Narpay” ko‘chasi 66-uyda yashovchi 3 nafar farzandning otasi, mehnatga layoqatsiz O.Haydarovning 6-sinfda ta’lim olayotgan farzandi Jonibek Islomovga ham berildi.
— “Bugun bayram arafasida menga bojxonachi akalarimiz maktab o‘quv qurollari jamlangan sovg‘a olib kelishdi. Bundan juda ham xursand bo‘ldim. Bu e’tibor butun umr xotiramda qoladi. Maktabda a’lo baholarga o‘qishga va’da berib men ham kelajakda harbiy sohada xizmat qilishni niyat qildim”, - deydi xursandchiligidan Bohodir Sirojov.
— “Qizim Sabina maktabda a’lo baholarga o‘qiydi. U kelajakda shifokor bo‘lmoqchi. Oilamizda sharoit og‘ir. Unga maktab sumkasini qanday olib bersam ekan deb o‘ylab yurgandim. Bugun viloyat bojxonachilari bizni xonadonimizga kelib qizimga sovg‘a berishdi. Bizlarni yo‘qlab kelganlaringiz uchun sizlardan minnatdorman”, - deydi II-guruh nogironi J.Abduxalilov.
Bolalarning xursandchiligini ko‘rib, har qanday insonning kayfiyati, ertangi kunga ishonchi ortib boraveradi. Axir ana shu yoshlar bizning kelajagimiz emasmi? Hozir biz kattalar yoshlarga qancha ko‘p g‘amxo‘rlik ko‘rsatsak, vaqti kelib ular ham bizlarga munosib javob qaytaradilar.
Izoh (0)