Трансплантация жарроҳлиги замонавий тиббиётнинг истиқболли йўналишларидан бири. Жигар циррози билан оғриган бемор ҳаётини сақлаб қолишнинг ягона йўли – трансплантация амалиётини ўтказишдир. Бу ҳақда «Янги давр» кўрсатувида маълумот берилди.
Бундай юқори технологик операциялар Америка, Россия, Германия, Норвегия, Швейцария ва Ҳиндистон каби тиббиёти ривожланган давлатларда бажарилади.
Ҳозирда Ўзбекистон ҳам улар қаторида. Ўзбекистон тиббиёти тарихида илк маротаба беморга тирик донор қариндошидан жигар бўлагини кўчириб ўтказиш амалиёти академик Воҳидов номидаги Республика ихтисослаштирилган илмий-амалий хирургия марказида олиб борилди.
Бундан 6 ой аввал 1-маротаба ушбу марказда ўзбек ва рус жарроҳларидан иборат гуруҳ томонидан жигар циррози билан оғриган 26 ёшли беморга унинг акаси 30 ёшли Ҳаёт Дадахўжаев донорлигида жигар бўлаги трансплантацияси бажарилган эди. Фурсатдан фойдаланиб, ака-укаларнинг аҳволи ҳақида шифокорлардан маълумот олдик.
– Юртингизда илк маротаба ўтказилган жигар трансплантацияси амалиётида биз ҳам иштирок этгандик, – шифокор-анестизиолог, Виталий Пчелников. – Операция ниҳоятда муваффақиятли ўтган эди. Куни кеча ака-укаларни яна бир бор текширувдан ўтказдик. Уларнинг аҳволи жуда яхши. Ҳар иккиласининг жигар фаолияти қониқарли даражада!
Бемор Қувончбек Зарипов асли Қашқадарёлик. Унга 2 йил олдин жигар циррози ташхиси қўйилган. Жиддий операция бошланди. Бир хонада бемор, иккинчи хонада унинг донор онаси. Бир гуруҳ тажрибали шифокорлар амалиётга киришишди.
Жигар трансплантацияси амалиёти 12—14 соат давом этади. Ҳар икки беморнинг аҳволи ҳақида кейинги дастурларда хабар берилади.
Изоҳ (0)