Норматив-ҳуқуқий ҳужжатлар лойиҳалари муҳокамаси порталида Миллий университет таркибида Ўзбек—Исроил қўшма Юқори технологиялар ва муҳандислик математикаси факультетини ташкил этиш тўғрисидаги Президент қарори лойиҳаси жойлаштирилди. Бу ҳақда Олий ва ўрта махсус таълим вазирлиги матбуот хизмати хабар берди.
Янги факультетда бакалавр ва магистрлар, илмий-педагогик кадрлар тайёрланиб, талабаларни ўқитиш тўлов-контракт асосида ўзбек, рус ва инглиз тилларида, кундузги таълим шаклида давлат таълим стандартлари талаблари инобатга олинган ҳолда Холон технологиялар институтида (Исроил) қабул қилинган таълим стандартлари, ўқув режалари ва дастурлари асосида амалга оширилади.
Талабаликка қабул қилиш ва факультет битирувчиларининг аттестацияси Холон технологиялар институтида белгиланган тартиб, талаблар ва муддатларга мувофиқ, Олий ва ўрта махсус таълим вазирлиги билан келишилган ҳолда амалга оширилади.
Факультет талабалари ўқув жараёнида Инновацион ривожланиш вазирлиги тасарруфидаги Илғор технологиялар маркази лабораторияларидан бепул фойдаланади.
Факультет битирувчиларига Ўзбекистон ва Исроилда олий таълим тўғрисидаги ҳужжат сифатида тан олинадиган диплом берилади.
Изоҳ (0)