Мексика пойтахти Мехикода 16—18 август кунлари бўлиб ўтадиган FIRST Global Challenge мусобақасида дунёнинг 180 га яқин давлатидан қатнашаётган ёш робототехника мутахассислари орасида Ўзбекистон вакиллари ҳам бор. Бу ҳақда мусобақада қатнашадиган Ўзбекистон жамоаси менежери Нодиржон Юсуфов «Дарё»га маълум қилди.
Мазкур челленж ҳар йили ҳар хил мамлакатда ўтказилиб, унда бутун дунёдан глобал муаммоларига Ғарбда STEM (Science, Technology, Engineering, Mathematics) деб юритилувчи илм-фан, технологиялар, муҳандислик ва математика соҳалари орқали ечим излашга бел боғлаган ёшлар қатнашади.
Тадбир расмий сайтида Ўзбекистон жамоаси ўзи ҳақида маълумотлар берар экан, Ўзбекистонни «Марказий Осиёнинг беш мамлакати билан чегарадош ва минтақанинг юрагида жойлашган жуда ёш мамлакат», деб таърифлайди. «Мамлакатимиз табиий бойликларга тўла, унинг йирик автомобиль саноати ва унумдор қишлоқ хўжалиги ерлари бор», — дейилади жамоа мурожаатида.
«Ўтган йилларда бутун мамлакатда таълим соҳасига илм-фан ва технологияларни олиб кириш мавзуси кенг тарқалди. 2018 йил президент томонидан ‘Инновациялар йили’ деб эълон қилинди ва Инновация вазирлиги тузилди. Энди эса бизга байроғимизни халқаро мусобақаларда ҳилпиратиш навбати келди ва биз олдимизга катта мақсадлар қўйганмиз», — дейди жамоа аъзолари.
Ўзбекистон жамоаси мамлакатнинг турли ҳудудларидан келган беш қатнашчидан иборат.
Навоийлик 16 ёшли Ҳумоюн Ҳайдаров 2018 йили ўтказилган ёш кашфиётчилар танлови республика босқичида ғолиб чиққан ва ишлаб чиқариш ҳамда давлат бошқаруви соҳасига инновациялар олиб киришни истайди.
«Беш йил аввал YouTube’даги видео орқали электроник кран ясашни ўрганганимда технологияларга муҳаббат қўйганман. Кейин мен ақлли вентиляция тизими, Ардуино мультиметри ва мобил совутгич ясадим», — дейди у.
17 ёшли Муҳаммадамин Умаров — пойтахтдан. У 2012 йили Шавкат Воҳидов номидаги халқаро аэрокосмик мактабда таълим олган ва Қирғизистоннинг нуфузли «Алтин туюн» мусобақасида муваффақиятли қатнашган. Айтишича, моделлаштиришга 5 ёшидан — илк машина моделини ясаган вақтидан бери қизиқади.
Жамоанинг яна бир конструктори — хоразмлик 18 ёшли Бунёдбек Зариповдир. Болалигидан « ўзи билан доим отвёртка олиб юрган» ва «бузилган жиҳозларнинг ишлаш механизмларини ўрганган ва яроқли қисмларини териб олиб, улардан янги қурилмалар» ясаган Бунёдбек Ўзбекистон миқёсида турли танлов ва кўргазмаларда иштирок этган.
Жамоа менежери Нодиржон Юсуфов бу йил Тошкентдаги Турин политехника университетини тамомлади. Халқаро алмашинув дастури орқали АҚШнинг West Virginia университетида таҳсил олиб қайтган. «Мен илм-фанни севаман ва, ўйлашимча, у глобал муаммоларни ҳал этишнинг калитидир», дейди Нодиржон. Шунинг учун у Ўзбекистон ёшларини илм-фанга катта иштиёқ билан тарбияланиши тарафдори.
Жамоага Давронбек Тошпўлатов инструкторлик қилмоқда. Талабалик йилларида ўзи ўқиган Турин политехника институтида Робо-Течниcс жамоасига етакчи бўлган, роботика бўйича мусобақалар, хусусан Марказий Осиё Роботика Челленжини ташкиллаштиришда қатнашган.
Жамоа аъзоларининг сўзларига кўра, уларнинг ушбу халқаро тадбирда иштирок этиши учун ташкилий масалаларда Инновация вазирлиги, хусусан, Фан, таълим ва ишлаб чиқаришни интергация қилиш бошқармаси бошлиғи Олимжон Тўйчиев амалий ёрдам берган.
Маълумот учун, Олимжон Тўйчиев 2017 йил июнь ойида президент Шавкат Мирзиёев томонидан Фан ва технологиялар агентлиги бош директори ўринбосари этиб тайинланган эди. Кейинчалик Тўйчиев янги ташкил этилган Инновация вазирлигида иш бошлади.
Изоҳ (0)