ЙПХ инспектори Жавоҳир Эргашев хизмат ўтаётган жойига яқин ҳудудда юз берган ёнғинда икки кишининг ҳаётини сақлаб қолган. Бу ҳақда «Тошкент» телеканалининг «Пойтахт-Вазият» кўрсатувида маълум қилинди.
Воқеа айнан қачон бўлганига аниқлик киритилмаган. Лавҳада 12 июль куни «Ойбек» метро бекати яқинидаги кўп қаватли уй биринчи қаватида жойлашган муассасада юз берган ёнғиндан видеопарча кўрсатилган. Кадр ортидаги овоз кафе ёнгани ҳақида гапиради.
Маълум бўлишича, ЙПХ инспектори Жавоҳир Эргашев зудлик билан воқеа жойига етиб бориб, ўт ўчирувчилар етиб келгунча кафе ичида бўлган ва ҳушсиз ҳолдаги икки фуқарони қутқариб, ташқарига олиб чиққан.
Жавоҳир Эргашевнинг ушбу ҳаракатлари Тошкент шаҳар ИИББ томонидан рағбатлантирилди. «Мақсадимиз — фуқароларнинг тинчлигини сақлаш, зарур вақтда уларга ёрдам кўрсатиш», — деди Эргашев.
Изоҳ (0)