Тожикистоннинг Somon Air миллий авиакомпаниясига тегишли Boeing-737-300 самолёти «Бухоро» халқаро аэропортига техник-танишув рейсини амалга оширди. Бу ҳақда ЎзА хабар бермоқда.
Шу муносабат билан ташриф буюрган меҳмонлар Бухоро шаҳар ҳокимлиги мутасаддилари, жамоатчилик вакиллари томонидан тантанали кутиб олинди. Йўловчилар орасида қўшни мамлакат авиакомпанияси директорининг биринчи ўринбосари Суҳроб Жўраев, сайёҳлик фирмалари раҳбарлари, тадбиркорлар ва ОАВ вакиллари бор эди.
Қайд этишларича, яқин вақтларда Душанбе ва Бухоро шаҳарлари ўртасида самолёт қатнови йўлга қўйилиши мўлжалланмоқда.
ЎзАнинг қўшимча қилишича, хорижий авиакомпания йўловчи самолётининг танишув рейси муваффақиятли ўтди. «Уни кўзда тутилаётган мунтазам қатновларнинг ташриф қоғози, дейиш мумкин», — дейилади агентлик ахборотида.
Изоҳ (0)