«Zarnews.uz»да эълон қилинган мақолада Самарқанд шаҳри марказида йўлга қўйилган велосипед ижарасининг салбий жиҳатларига тўхталиб ўтилди.
«Самарқанд шаҳрига келган меҳмонлар ва маҳаллий аҳоли учун бир қанча қулайлик яратилиб, замонавий хизматлар йўлга қўйиляпти. Ислом Каримов кўчасида якка тартибдаги тадбиркорлар томонидан ёшлар сайр қилиши учун велосипед ижараси ҳам ташкил этилган. Айни пайтда ушбу ҳудудда 200 тадан зиёд велосипед бор. Бу яхши, албатта, аммо бу хизматдан фойдаланувчиларнинг айримлари велосипедни бошқаришни яхши билмаслиги ёки ёшларнинг велосипедда ўзаро пойга уюштираётгани сайёҳларга ноқулайлик туғдирмоқда. Баъзан пиёдаларни уриб кетиш, меҳмонларга хизмат кўрсатаётган электромобиллар билан тўқнашув содир этилаётгани ҳудудда бир қанча тартибсизликларни юзага келтиряпти», — дейилади хабарда.
– Бу майдонда велосипедларнинг ҳаракатланиши бизга халақит беради, – дейди электромобил ҳайдовчиси Фаррух Ҳусенов. – Машинада ҳаракатланиб кетаётган пайтда улар кутилмаганда олдимизда пайдо бўлиб қолади. Рулни у ёки бу томонга кескин буришнинг иложи йўқ. Боиси, ҳар икки томонда ҳам пиёдалар бор. Яқинда бир бола велосипедда кета туриб, бошқарувни йўқотди ва тўхтаб турган машинамга келиб урилди. Боланинг у ер-бу ери лат еди-ю, ҳарқалай жиддий жароҳатланмади. Сўнгги пайтларда велосипед ҳайдаётган болаларнинг пиёдаларни уриб кетаётганига тез-тез дуч келяпмиз. Лекин ҳеч ким бу ҳолатни тартибга солишга қизиқмаяпти.
Аммо ушбу хизматни ташкил этган тадбиркорлар гўё ҳаммаси жойида эканлигини, шу кунгача велосипед билан боғлиқ ҳеч қандай кўнгилсизлик юз бермаганини айтмоқда.
– Фаолиятим «Ягона дарча» томонидан қонуний рўйхатдан ўтказилган, – дейди тадбиркор Мансур Аҳмедов. – Тасарруфимда 20 та велосипед бор. Мижозларнинг бирортаси пиёда ёки бу ерда ҳаракатланаётган электромобилларга тўқнашгани йўқ. Велосипедни ижарага беришдан олдин уларга секин ҳайдашни, бошқарув жараёнида эҳтиёт бўлишни тайинлаймиз.
Аммо ушбу ҳудудда сайр қилиб юрганларнинг фикри бошқача. Кўпчилик бу ердаги велосипедлар ҳаракати туфайли ёш болалар билан айланиш хавфли бўлиб қолгани, йигит-қизларнинг тун ярмигача бақир-чақир қилиб, велосипед миниб юришини айтади.
«Доим одамлар билан гавжум бўладиган бу ҳудудда велосипед ҳаракатланиши мумкинми? Бу ерда велосипед ижарасини ташкил этиш-чи?» — деган саволни кўтаради нашр.
Изоҳ (0)