Шу йил 30 июль куни М.Жасур ички ишлар органларига мурожаат қилиб, Юнусобод туманида автомашинасидан ичида пластик карточкалари, гувоҳномаси ва пуллари бўлган сумкаси номаълум шахс томонидан ўғирлаб кетилгани ҳақида маълум қилди. Бу ҳақда Тошкент шаҳар ИИББ матбуот хизмати хабар бермоқда.
28 июль куни кечки пайт Жасур машинани бир чеккага тўхтатиб, ундан тушиб кетганди. Машинанинг орқа ўриндиғида эса унинг 59 ёшли онаси Б.Гулбаҳор ўтирганди. Шу пайт бир йигит машина олдига келиб, салонга мўралайди ва ойнадан қўлини тиқиб, сумкачани олиб кетади. Гулбаҳор буни дарров пайқамади, йигит ниманидир сўрамоқчи бўлиб келяпти деб ўйлайди. Сумкани олиб кетаётган йигит нарироқда кутиб турган бошқа бир боланинг олдига етганда эса орқасидан бақиради.
Йигитлар бақириқ овозини эшитиб, орқага қарашади, улар машина ичида одам борлигини сезишмаганди. Шундан сўнг қўрқиб кетиб, воқеа жойидан қочиб кетишади. Жасур ўша куни ҳам, эртасига ҳам ички ишларга бу ҳақда хабар бермади. Лекин орадан маълум вақт ўтиб, унга нотаниш аёл телефон қилади ва «Ганга»даги ер ости йўлагидаги чиқинди идишидан 3 та пластик банк карточкасини топиб олганини айтади. Шундан сўнггина Жасур бу ҳақда ариза ёзишга қарор қилади.
Жабрланувчининг қайд этишича, ўғирланган сумкачада гувоҳнома ва карточкадан ташқари, 310 АҚШ доллари, 300 минг сўм, флешка ва ишхонасининг калити бўлган.
Кузатув камераси ёрдамида ички ишлар ходимлари гумондорларнинг шахсларини аниқлади. Бу эса уларга ортиқча қийинчилик туғдиргани йўқ, чунки бу йигитларни ходимлар жуда яхши эслаб қолишганди...
Жорий йилнинг 3 июнь куни 16 ёшли А.Акбар ва К.Ҳусниддин ҳамда 17 ёшли У.Иброҳим ва М.Азизбек томонидан Исломобод кўчасида тўхтаб турган автомобиль салонидан 2 та уяли алоқа воситаси ўғирланган. Ушбу ҳолат бўйича жиноят иши қўзғатилган. Болаларнинг ёшлигини инобатга олган ҳолда уларнинг барчаси ота-онасининг шахсан кафиллиги билан тергов жараёнида озодликда қолдирилганди.
13 июнь куни эса иш судга оширилган, у 1 август куни кўриб чиқилиши керак эди.
Энди эса гумондорлар А.Акбар ва К.Ҳусниддин такроран жиноят содир этганликлари ва жиноий жавобгарликка тортилганликлари учун суд аввалги эҳтиёт чорасини қамоққа олиш чорасига ўзгартирди.
Изоҳ (0)