Buxoro viloyat Ichki ishlar boshqarmasida O‘zbekiston Respublikasi Prezidenti Shavkat Mirziyoyev rahbarligida bo‘lib o‘tgan kengaytirilgan videoselektor yig‘ilishida berilgan topshiriqlar ijrosini ta’minlash va nazorat qilish masalalariga bag‘ishlangan yig‘ilish bo‘lib o‘tdi. Bu haqda viloyat IIB “Daryo”ga ma’lum qildi.
Yig‘ilishda dastlab Huquqbuzarliklar profilaktikasi va jinoyatchilikka qarshi kurashish bo‘yicha viloyat idoralararo komissiyasi tomonidan 2018-yilning 6 oyi mobaynida hamkorlikda amalga oshirilgan ishlar, yo‘l qo‘yilgan kamchiliklar va kelgusidagi vazifalar xususida so‘z bordi.
Ta’kidlanganidek, joylardagi komissiyalar tomonidan profilaktik tadbirlar tizimli ravishda tashkil etilmaganligi sababli, 2018-yilning 6 oyida og‘ir va o‘ta og‘ir turdagi jinoyatlarning ayrim shahar-tumanlarda ko‘payib ketishiga yo‘l qo‘yilgan.
Xususan, qotillik jinoyatlari viloyatda 14 tadan 13 taga kamaygan bir vaqtda, Kogon, Peshko‘, Vobkent va Jondor tumanlarida nisbatan ko‘p sodir etilgan. Shuningdek, qasddan badanga og‘ir tan jarohati yetkazish jinoyati ham viloyat bo‘yicha 22 tadan 19 taga kamaygan bo‘lsa-da, bu turdagi jinoyatlar G‘ijduvon, Qorovulbozor va Shofirkon tumanlarida ancha oshgan.
Joriy yilning 6 oyi mobaynida xotin-qizlar tomonidan sodir qilingan jinoyatlar viloyatda 371 tadan 185 taga yoki 50,1 foizga kamaygan bo‘lsada, lekin o‘tgan davrda aksariyat shahar-tumanlarda ayollar o‘rtasida jinoyatchilikning oldini olish borasidagi ishlar talab darajasida tashkil etilmaganligi natijasida bu toifa shaxslar tomonidan sodir etilgan jinoyatlar Buxoro tumanida 4 taga va Qorako‘l tumanida 3 taga ko‘p qayd qilindi.
Shu bilan birga, yig‘ilishda O‘zbekiston Respublikasi Vazirlar Mahkamasining 2018-yil 8-yanvardagi “Fuqarolar va jamoat tashkilotlarini huquqbuzarliklar profilaktikasi va jinoyatchilikka qarshi kurashishdagi faol ishtiroki uchun rag‘batlantirish tartibi to‘g‘risida nizomni tasdiqlash haqida”gi Qaroriga asosan huquqbuzarliklar va jinoyatchilikka qarshi kurashishda faol ishtirok etgan 16 nafar fuqarolar ichki ishlar boshqarmasi tomonidan pul va esdalik sovg‘alar bilan rag‘batlantirildi.
Izoh (0)