30 июль, душанба куни Самарқандда Мудофаа вазирлигига қарашли Кичик мутахассисларни тайёрлаш марказида биринчи битирув маросими бўлиб ўтди. Бу ҳақда Мудофаа вазирлиги матбуот хизмати «Дарё»га хабар берди.
3 ойлик курс давомида таҳсил олган курсантларнинг 75 нафарига «Катта сержант», 73 нафарига «Сержант» навбатдаги ҳарбий унвонлар, шунингдек, 198 нафарига малака оширгани тўғрисида сертификатлар топширилди.
Тадбирда мудофаа вазири, генерал-майор Абдусалом Азизов, Самарқанд вилояти ҳокими ўринбосари Рустам Қобулов, Ёшлар иттифоқи Самарқанд вилояти кенгаши раиси Абдулло Асланов иштирок этди.
Кичик мутахассисларни тайёрлаш маркази Президентнинг 2017 йил 12 декабрдаги фармонига мувофиқ ташкил этилган. Марказ Қуролли Кучлар қўшинлари таркибига кирувчи Мудофаа вазирлиги, Ички ишлар вазирлиги, Давлат хавфсизлик хизмати, Миллий гвардия қўшинларининг кичик командирларини тайёрлаш, қайта тайёрлаш ва уларнинг малакасини ошириш учун мўлжалланган.
Ҳозирда марказда муҳандислик, алоқа, зирҳли танк хизмати, артиллерия, қуруқликдаги қўшинлар ва ҳаво ҳужумидан мудофаа сингари 11 мутахассислик бўйича кичик мутахассислар тайёрлаш тизими йўлга қўйилган.
Эслатиб ўтамиз, Президент фармонига асосан Ўзбекистонда сержантлар тайёрлаш мактаблари тугатилган ва Самарқанд олий ҳарбий автомобиль қўмондонлик-муҳандислик билим юрти ўрнида Кичик мутахассисларни тайёрлаш маркази ташкил қилинган.