Тожикистон Ички ишлар вазири Рамазон Раҳимзода Данғара шаҳрида чет эллик сайёҳларга қуролланган ҳужум уюштирилгани тўғрисидаги фактни тасдиқлади. Бу ҳақда Sputnik хабар берди.
29 июль куни Данғара тумани Себистон жамоати ҳудудида тўрт нафар чет эллик сайёҳ ҳалок бўлди. Уларнинг икки нафари АҚШ, бири Нидерландия ва яна бири Швейцария фуқаросидир.
Яна уч нафар сайёҳ жароҳатлангани маълум қилинмоқда.
Вазирнинг сўзларига кўра, туристлар устига машина билан бостириб бориш ҳолатидан ташқари, такрорий ҳужум ҳолати ҳам қайд этилган. Машина ёш йигитларни уриб кетгач, жиноятчилар автомобиль ичидан сакраб чиқиб, сайёҳларга пичоқ билан ҳамла қилган.
«Бу шармандали жиноят. Уч нафар гумондор ҳозирда қочиб юрибди. Ҳозирда бу билан махсус тузилган гуруҳ шуғулланмоқда. Барча тафсилотларни аниқлаштирмоқдамиз. Данғарада юз берган ҳодисанинг тўлиқ ҳолати ҳозирча аниқ эмас», — деб айтган Раҳимзода.
Вазирнинг таъкидига кўра, тезкор-суриштирув тадбирлари натижасида ҳужум уюштирганларнинг бир нафари ўлдирилган, бири қўлга олинган ва яна уч нафари қидирилмоқда. Ўлдирилган шахснинг ёнидан ўқотар қурол топилган, бу эса қолган жиноятчилар ҳам қуролланган бўлган бўлиши мумкин деган фикрни туғдиради.
Тожикистон президенти Эмомали Раҳмон велосайёҳларнинг ҳалок бўлиши муносабати билан уч мамлакат раҳбарига ўз ҳамдардлигини билдирди.
Айни вақтда жиноий гуруҳнинг қолган аъзоларини ушлаш бўйича тадбирлар амалга оширилмоқда. Дастлабки версияга кўра, бир гуруҳ чет эллик сайёҳ устига Нурек шаҳридан бўлган 21 яшар Жаъфариддин Юсуфов бошқарувидаги Daewoo Леганза русумидаги автомашина бостириб борган.
Ҳодиса юз берганидан сўнг машина воқеа жойидан яширинган, аммо тез орада Данғаранинг Торбулоқ қишлоғи ҳудудидан топилган.
Тожикистон ИИВ чет эллик сайёҳларга уюштирилган ҳужум ЙТҲ, босқинчилик ҳужуми, талончилик, қотиллик ва ҳатто теракт оқибатида юз берган бўлиши мумкин, деган тахминларни илгари сурмоқда.
Изоҳ (0)