Президентнинг «Миллий киноиндустрияни ривожлантириш бўйича қўшимча чора-тадбирлар тўғрисида»ги қарорида миллий кино тарғиботига ҳам катта аҳамият берилган. Бу ҳақда «Республика кинопрокат маркази» давлат унитар корхонаси директори Маъруфжон Мухторов маълум қилди, дея хабар беради ЎзА.
— Шу кунга қадар фильмлар тарғиботи, унинг рекламаси анча оғир масала эди. Кўпинча, олинаётган кинолар ҳақида аҳоли хабардор этилмасди. Бу эса томошабинларни қизиқишини сусайтириб, кинотеатрларга ташрифини камайишига сабаб бўлди, — дейди М.Мухторов. — Энди бу борада янги тизим ишлаб чиқилди. Яъни лойиҳадаги 10 фоиз маблағ кино тарғиботига, унинг суратга олиш ишлари бошланганидан премераси бўлгунга қадар ОАВда тарғиб этилиши учун сарфланади.
Марказимиз жорий йилнинг 6 апрелида ташкил этилган бўлиб, Ўзбекистонда кинопрокат тизимини яратиш билан шуғулланамиз. Яъни ягона рэпертуар асосида миллий киноларни бир вақтнинг ўзида ва мунтазам онлайн етказиб берамиз. Барча кинотеатрларни бир тармоққа бирлаштириб, фильмларни марказлашган ҳолда тизимли равишда намойишини уюштирамиз.
Бу қандай амалга оширилади? Бунинг учун барча кинотеатрларда Ўзбекистонда ишлаб чиқарилган фильмлар бир вақтда оптик алоқадан фойдаланган ҳолда онлайн тарзда кўрсатилади. Мисол учун, Тошкент шаҳридаги Алишер Навоий номидаги кинотеатрда соат 11:00 да фильм намойиши бошланадиган бўлса, у чекка ҳудуддаги киносаройда ҳам бошланади. Шу тариқа энг чекка ҳудуддаги аҳоли ва ёшларни киномаҳсулотлар билан таъминлашга эришилади.
Бу тизимга 2019 йилнинг 1 январидан ўтилади. Шунингдек, электрон чипталарни автоматлаштирилган тизими ҳам жорий этилади. Бу орқали биз қайси фильмга қанча томошабин келгани, уларнинг қайси мавзу ва жанрдаги фильмларга эҳтиёжи юқори эканини мониторинг қилиш имконига эга бўламиз.
Миллий кинолардан ташқари халққа манзур бўладиган хорижий фильмларни олиб келиш билан ҳам шуғулланамиз. Айтайлик, Туркия, Корея, Хитой, Ҳиндистон, Эрон, Россия киноижодкорларини асарлари кўпчиликка маъқул бўлмоқда. Ҳозирда ана шу давлатларда яратилган янги киноларни харид қилиш борасида музокаралар олиб боряпмиз.
Изоҳ (0)