Урганч касб-ҳунар коллежи ўқувчиси Бобур Эгамбердиев «Краина» Бутунукраина фуқаролик ташкилотининг «За Розбудову Украини» («Украина ривожи учун») ордени билан тақдирланди. Бу ҳақда «Халқ сўзи» хабар бермоқда.
Эндигина 18 ёшга қадам қўйган Бобурнинг тил ўрганиш, илм чўққиларини эгаллашда эришаётган ютуқларига ҳавас қилса арзигулик. У ўтган йил Россияда ўтказилган рус тили ва адабиёти бўйича халқаро олимпиадада номинация ғолиби, жорий йилда Taтаристон пойтахти Қозон шаҳрида ташкил қилинган татар тили ва адабиёти халқаро олимпиадасида 2-ўрин соҳиби бўлди.
Бобурнинг хорижий тилларни ўрганиш орқали ёшлар ўртасида халқаро ҳамдўстликни мустаҳкамлаш, илм-фанга қизиқишини кучайтириш бўйича қатор мақолалари хорижий нашрларда чоп этилган.
Унинг ижодий изланишлари муносиб эътироф этилиб, ўтган йилда Франциянинг Euro Star-2017 мукофоти соҳиби бўлган эди. Яқинда эса Бобур Украина ордени билан тақдирланди.
Ёш тадқиқотчи ўзбек ва украин тиллари назариясини ўрганиш, дўстлик алоқаларини мустаҳкамлашда эришган ютуқлари учун ушбу нуфузли мукофотга лойиқ кўрилди.
Изоҳ (0)