Жанубий Кореянинг Korea Data Agency (K-Data) агентлиги Тошкент шаҳридаги Инҳа университетига маълумотлар базасини мониторинг қилиш ва таҳлил қилиш учун қарийб 500 минг долларлик дастурий таъминотни тақдим этди. Бу ҳақда университет сайтида хабар берилди.
Бош менежер Жун-хюн Ли раҳбарлигидаги K-Data делегацияси 2018 йилнинг 25 июль куни Тошкент шаҳридаги Инҳа университети (IUT)га ташриф буюрди.
Ташриф доирасида K-Data агентлиги IUT маъмуриятига Wise Intelligence ва Exem томонидан ишлаб чиқарилган маълумотлар базасини мониторинг қилиш ва таҳлил қилиш бўйича бепул лицензияларни тақдим этди.
Корея компанияларининг дастурий таъминотлари маълумотлар соҳасидаги мутахассисларни тайёрлаш учун фойдаланилади.
Жанубий Корея делегацияси ташрифи доирасида IUT нинг биринчи проректори Чо Ву Суг ва K-Data агентлиги Бош менежери Жун-хюн Ли ўртасида ўзаро англашув меморандуми имзоланди.
Ҳужжатга мувофиқ, томонлар маълумот соҳасидаги талабалар ва тадқиқотчиларнинг малакаси ва кўникмаларини биргаликда оширишни мўлжалламоқда.
Шунингдек, IUT ва K-Data агентлиги маълумотлар соҳасидаги қўшма тадқиқотлар ва лойиҳаларни, шу жумладан очиқ маълумотлар, маълумотларни таҳлил қилиш, маълумотларни бошқариш, маълумотлар сифати ва бошқалар каби соҳаларда амалга оширишни режалаштирмоқда.
Ҳамкорлик соҳаларидан бири ахборот соҳасидаги билим, тажриба ва ахборот алмашиш учун турли конференциялар, симпозиумлар, семинарлар ва бошқа тадбирларни ташкил этиш бўлади.
Изоҳ (0)