Жиноят ишлари бўйича Тайлоқ туман судида судья Б.Жўраев раислигида ўз хотинини дастлаб калтаклаб, сўнг бўғиб ўлдирган Наимжон Раҳимовнинг жиноий иши кўриб чиқилди, деб хабар бермоқда «Дарё» мухбири Фарҳод Норбўтаев.
Судда 2017 йилнинг 25 август куни соат тахминан 22.00 атрофида Н.Раҳимов маст ҳолатда, Тайлоқ тумани, Гулобод маҳалласида жойлашган аҳолига хизмат кўрсатиш учун мўлжалланган ошхонада, турмуш ўртоғи Марина Раҳимова билан ўзаро жанжаллашиб, жанжал давомида турмуш ўртоғи М. Раҳимованинг юз қисмига қўли билан уриб юборади. Мушт зарбидан ерга йиқилган жабрланувчининг Н. Раҳимов қорин, бел соҳаларига ва танасининг бошқа қисмларига оёқлари билан тепиб, қўллари билан бўйнидан бўғиб қасддан ўлдирганлиги аниқланди.
Суд жараёнида судланувчи Н. Раҳимов турмуш ўртоғининг вафот этганини эртаси куни (2017 йил 26 август куни) билганлигини билдириб ўтди. Бу ҳақида ҳеч кимга айтмасдан, шу куни ярим тунда хотинининг жасадини яшаш уйи ҳовлисига кўмиб қўйган. Фарзандларига, маҳалладошларига эса турмуш ўртоғини Россияга кетиб қолди деб айтган. Орадан тахминан бир ойлар ўтиб турмуш ўртоғи кўмилган жойнинг устига ғишт териб ташлаганлигини билдириб ўтди.
Судланувчи Наимжон Раҳимов судда айбига тўлиқ иқрорлик билдириб, марҳума Марина Раҳимова турмуш ўртоғи эканлигини, у 1990 йилда олий ўқув юртига кириш учун Украина Республикасига кетганлигини, у ерда Марина Раҳимова билан танишиб, турмуш қурганлигини, 1996 йилда Украина Республикаси фуқаролигини олганлигини ва шу йили Ўзбекистонга оиласи билан қайтиб келганлигини билдириб ўтди.
Суд жараёнида содир бўлган ҳолатлар атрофлича ўрганилиб, судланувчи Наимжон Раҳимов Ўзбекистон Республикаси Жиноят Кодексининг 97-моддаси («Қасддан одам ўлдириш») 1-қисмида назарда тутилган жиноятни содир этганликда айбдор деб топилиб, унга нисбатан шу Кодекснинг 57-моддаси («Енгилроқ жазо тайинлаш») қўлланилиб, 8 йил озодликдан маҳрум қилиш жазоси тайинланди.
Изоҳ (0)