Ўзбекистонга кириш электрон визасини олиш учун мурожаат қилган хориж фуқаролари сони 25 июль ҳолатига кўра 1555 нафарга етди. Бу ҳақда Бош вазир ўринбосари Азиз Абдуҳакимов маълум қилди, дея хабар беради ЎзА.
Ўтган 10 кун ичида дунёнинг 41 давлатидан Ўзбекистонга кириш электрон визасини олиш учун мурожаат қилинган. Улардан 1095 кишига электрон визалар тақдим этилган. 460 мурожаат эса кўриб чиқилмоқда. Электрон виза сўраб мурожаат этганларнинг 1062 нафари эркак, 493 нафари аёллардир. Ҳеч кимга рад жавоби берилмади.
Ўзбекистонга энг кўп қизиқиш билдираётганлар сафида ҳамон Хитой фуқаролари етакчилик қилмоқда. E-visa олиш учун мурожаат этган хитойликлар сони 295 нафарни ташкил этади. Иккинчи ўринда АҚШ фуқаролари бўлиб, улар томонидан 216 та сўровнома тўлдирилган.
Шунингдек, Буюк Британия (176 нафар), Ҳиндистон (154) ва Франция (100) фуқаролари ҳам бу рўйхатда кўпчиликни ташкил этади. Ўтган хафтада Испания фуқароларидан тушган мурожаатлар сони ҳам сезиларли даражада ошган бўлиб, уларнинг сони ҳозирда 70 тага етди.
Изоҳ (0)