Ўзбекистонда муомаладаги нақд пул ҳажми ортди

Ўзбекистонда муомаладаги нақд пул ҳажми ортишда давом этмоқда. Бу ҳақда Spot хабар берди.

Марказий банк маълумотларига қараганда, 1 июль ҳолатига кўра, муомаладаги нақд пуллар 21 триллион сўмни ташкил қилди. 1 июнь ҳолатига кўра 20 триллион сўм нақд пул, 1 май ҳолатига кўра эса 18 триллион сўм муомалада бўлган.

Шу билан биргаликда, сўмдаги жамғармаларда сақланаётган пуллар миқдори ҳам ортди. 1 июль ҳолатига кўра жамғармаларнинг умумий ҳажми 32,8 триллион сўмни ташкил қилди.

Валюта жамғармаларидаги пуллар миқдори эса аксинча камаймоқда. 1 июль ҳолатига кўра улар 23 триллион сўмни ташкил қилди.

Кенг маънодаги пул массаси (муомаладаги нақд пуллар, жамғарма ва қимматли қоғозлар) 1 июль ҳолатига кўра 77,4 триллион сўмни ташкил қилган. Июнда бу кўрсаткичи 76,2 триллион сўм, майда — 74,6 триллион сўмга тенг бўлган.