Бош прокуратура академияси Франциянинг Миллий магистратлар мактаби билан ҳамкорлик битимини имзолади
Бош прокуратура академияси бошлиғи бошчилигидаги Ўзбекистон делегацияси Франция Миллий магистратлар мактаби таклифига биноан Парижда ишчи сафар билан бўлди. Бу ҳақда Бош прокуратура матбуот хизмати хабар берди.
Франциянинг Миллий магистратлар мактаби (ENM) раҳбарияти ва ўқитувчилари билан ўтказилган учрашув давомида икки тарафлама ҳамкорлик масалалари муҳокама қилинди.
Хусусан, муассасалар ўртасидаги фаол ҳамкорлик натижалари муҳокама қилинди. Жумладан, 2017 йилдаги ЭНМ фаолияти билан танишув, Бош прокуратура академиясига ENM етакчи ўқитувчилари ва мутахассисларининг ташрифлари, шунингдек, уларнинг академия фаолиятини такомиллаштириш ва унинг салоҳиятини мустаҳкамлашдаги ҳиссалари қайд этилди.
Учрашув натижаларига кўра, Франциянинг Миллий магистратлар мактаби билан ҳамкорлик тўғрисидаги битим имзоланди. Унда прокуратура органлари ходимларининг касбий ривожланиш дастурлари соҳасида доимий тажриба, ҳуқуқий ҳужжатлар, илмий нашрлар ва ўқув дастурларининг ўзаро алмашинуви, ҳамкорликда тадбирлар ўтказилиши кўзда тутилган.
Томонлар академик фаолликни таъминлаш доирасида маърузачилар, ўқитувчилар ва амалиётчи ходимлар билан алмашиниб туришга келишди.
Шунингдек, учрашув давомида ўзбек делегацияси Франция Адлия вазирлигининг Халқаро ҳамкорлик агентлиги (JCI), Франция Коррупцияга қарши курашиш агентлиги (AFA) раҳбарлари билан учрашувлар ўтказиб, келгусидаги ҳамкорлик истиқболларини белгилаб олди.
