Жиззах вилоят Янгиобод туман ИИБ бошлиғи Илҳом Сулаймоновга нисбатан Жиноят кодексининг 206-моддаси 1-қисми билан жиноий иш қўзғатилди. Бу ҳақда Ўзбекистон Бош прокуратураси матбуот хизмати «Дарё»га маълум қилди.
2018 йил 9 июль куни Янгиобод туманида яшовчи фуқаро Н.Т. Бош прокуратуранинг «Ишонч телефони»га мурожаат қилиб, фарзанди С.Қ.ни туман ИИБ бошлиғи Илҳом Сулаймонов «Нима сабабдан комбайнни тузатмадинг?» деб уриб, тан жароҳати етказганлиги сабабли Илҳом Сулаймоновга нисбатан қонуний чора кўришни сўраган.Гумонланувчи Илҳом Сулаймонов қайд этилган модда бўйича айбдор деб топилса, кўпи билан уч йилгача озодликдан маҳрум этилиши мумкин.Мурожаат юзасидан Янгиобод тумани прокуратураси томонидан ўтказилган терговга қадар текширишда сўралган фуқаро С.Қ. 2018 йил 7 июль куни соат 14:30 ларда Янгиобод тумани ИИБ бошлиғи Илҳом Сулаймонов туман ҳокими Икром Матиев билан бирга «Мустақилликнинг 22 йиллиги» сув истеъмолчилари уюшмаси ҳудудидаги «Пасткичақир булоғи» фермер хўжалиги даласига келган вақтда, комбайнлар ғалла ўрмасдан турганлиги боис, туман ИИБ бошлиғи Илҳом Сулаймонов фуқаро С.Қ.ни мушти билан бурун қисмига уриб, оёғи билан унинг орқасига тепганлигини билдирган.
Зомин тумани суд-тиббий экспертиза бюросининг хулосасида фуқаро С.Қ.га бурун суягининг ёпиқ синиши, бурун сохаси лат ейиши, қонталаши каби соғлиғининг бузилишига олиб келган енгил тан жароҳати етказилганлиги кўрсатилган.
Мазкур ҳолат юзасидан Янгиобод туман прокурори томонидан 18 июлда туман ИИБ бошлиғи Илҳом Сулаймоновга нисбатан Жиноят кодексининг 206-моддаси 1-қисми билан жиноят иши қўзғатилиб, дастлабки тергов ҳаракатлари вилоят прокуратураси ўта оғир жиноятларни тергов қилиш бўлими томонидан олиб борилмоқда. Тергов ҳаракатларини бориши Бош прокуратура томонидан назоратга олинди.
Бош прокуратура ахборотидан
Маълумот учун, Каттақўрғонда ўғриликда гумон қилинган аёлни шаҳар ИИБ биносида қип-яланғоч ечинишга мажбур қилган милиция ходим Санъат Умаровга нисбатан ҳам жиноий иш қўзғатилган ва у қамоққа олинган (ИИВ уни «ички ишлар органлари сафига тасодифан кириб қолган нопок ходим» деб атаган эди). Андижон вилоятининг Бўз туманида кечаси кўчада айланиб юрган йигитларни уриб, ҳақоратлаган ходимларга нисбатан ҳам хизмат текшируви бошлангани маълум қилинган.
Изоҳ (0)