Япония жануби-ғарби ва марказида юз берган сув тошқинлари оқибатида ҳалок бўлганлар сони 209 тага етди. Бу ҳақда Япония вазирлар маҳкамасининг бош котиби Ёсихидэ Суга Токиода 14 июль, шанба куни бўлиб ўтган матбуот анжуманида маълум қилди, дея «РИА Новости» хабар бермоқда.
Табиий офат натижасида жароҳат олган бир кишининг аҳволи ўта оғир, дея баҳоланмоқда. Расман 20 киши бедарак йўқолган деб эълон қилинган. Шу билан биргаликда, яна 28 кишининг қаерда экани аниқланмаган.
Бош котиб Суганинг сўзларига қараганда, табиий офат оқибатларини бартараф қилиш ишларига полиция, мудофаа кучлари ва ёнғин хавфсизлиги хизматининг 63 минг ходими жалб қилинган. Жойларга 80 та вертолёт юборилган.
Сув тошқинларидан жабр кўрган ҳудудларда ҳамон ер кўчиши хавфи бор. 35 даража иссиқ об-ҳаво мавжуд вазиятни янада мураккаблаштирмоқда. Ваҳоланки, 200 мингга яқин уй-хўжаликлари ҳамон сувсиз қолмоқда. Жабр кўрган ҳудудларнинг 5 мингдан ортиқ аҳолиси эвакуация пунктларига кўчирилган.
15 июль, якшанба куни бош вазир Синдзо Абэ Хиросима префектурасига ташриф буюради. Бу бош вазирнинг сўнгги 5 кун ичида жабр кўрган ҳудудларга амалга оширган учинчи ташрифи бўлади. Танқидчиларнинг фикрича, Абэ шу йўл билан сентябрда бўлиб ўтадиган Либерал-демократик партия раиси сайловлари олдидан жамоатчиликнинг хайрихоҳлигига эришмоқчи.
Эслатиб ўтамиз, Японияда ўтган ҳафта ўрталарида «Прапирун» тайфуни кучли жалани келтириб чиқарган. Бу эса дарёлар сувининг кўпайиши ва ер кўчишларига олиб келган. Табиий офатлар оқибатида ҳалок бўлганлар сони 8 июль, якшанба 80 нафар, 10 июль, сешанба куни 140 нафар, шу куннинг иккинчи ярмида 157 нафар, 11 июль, чоршанба куни 176 нафар, 13 июль, жума куни 204 нафарга етгани маълум қилинган. Шунингдек, 4 мингга яқин киши коммуникация воситаларидан узилиб қолгани ҳақида хабар берилган.
Аввалроқ, Шавкат Мирзиёев Япония бош вазири Синдзо Абэга таъзия билдирган.
Изоҳ (0)