«Ўздонмаҳсулот»нинг собиқ раҳбари ва унинг куёви коррупцияда айбланмоқда

«Ўздонмаҳсулот» холдинги бошқарувининг собиқ раиси Сурат Ҳайдаров порахўрликда айбланиб ҳибсга олинди. Бу ҳақда «Газета.uz» хабар бермоқда.

Айтилишича, Сурат Ҳайдаров мансабидан фойдаланган ҳолда холдинг тизимига ўз қариндошларини ишга жойлаган. Шу йўл билан у пора олиш тизимини яратиб олган. У вилоятларга чиқиб, дон маҳсулотлари нотўғри сақлангани учун пора олган. Бошқа муаммолар ҳам шу йўл билан ҳал этилган.

Тергов «Ўздонмаҳсулот» структур корхоналари раҳбарлари томонидан берилган пул мукофотларининг умумий суммасини аниқламоқда.

Ишда Сурат Ҳайдаровнинг куёви Жамшид Шариповнинг исм-шарифи ҳам бор — у чет эл валютасида пора олиш чоғида қўлга олинган. У пора эвазига «Ўздонмаҳсулот» маркетинг бошлиғига ҳомийлик ва дахлсизлик ваъда қилган.

Айбланувчилар ҳибсга олинган.