Қорақалпоғистоннинг Мўйноқ тумани ҳокимлиги ҳудуд сувсиз қолгани ҳақида ОАВ ва ижтимоий тармоқларда тарқалган хабарларга изоҳ берди. Бу ҳақда «Nuz.uz» маълум қилди.
«Бутун Мўйноқ сувсиз қолгани йўқ. Бу бутунлай ёлғон хабар. Бизнинг ҳисобимизга кўра, айни пайтда шаҳардаги хонадонларнинг 3 фоизидагина сув билан таъминланишда муаммо мавжуд. Техник жиҳатдан бу меъёрий ҳолат ҳисобланади. Лекин биз учун ҳар бир уй, ҳар бир оила муҳим, шу боис шаҳар маъмурияти сув таъминоти тизимидаги камчиликни бартараф этиш учун тезкор чоараларни кўрмоқда", — деди туман ҳокими Сайловбой Дониёров.
Унинг сўзларига кўра, муаммо рельефнинг ўзига хос хусусиятлари билан боғлиқ: шаҳарнинг айрим туманларида қувурлардаги босимнинг пастлиги туфайли сув истеъмолчиларгача етиб бормаяпти.
Тегишли манзилларга таъмирлаш гуруҳлари йўл олган. Ҳокимлик яқин вақт ичида сув таъминотини тўлиқ тиклашга ваъда берди.
Маълумот учун, Мўйноқда қиймати 26,6 миллиард сўмлик сув қувури ўтган йили ишга туширилганди.
Изоҳ (0)