Фарғона вилояти Олтиариқ туманидаги 89-оилавий поликлиника ва туман тиббиёт бирлашмаси «Электрон поликлиника» автоматлаштирилган ахборот тизимига уланди. Бу ҳақда «Дарё» мухбири Азизжон Эрматов хабар берди.
Дўстлик, Полосон, Беруний, Ёшлик, Муқимий, Жонибек ва Ибн Сино маҳаллаларининг 20 минг 850 дан зиёд аҳолисига бирламчи тиббий хизмат кўрсатадиган мазкур поликлиникани тўлиқ таъмирдан чиқариш учун 750 миллион сўмдан зиёд маблағ сарфланди. Аҳолига тиббий хизмат кўрсатиш сифатини яхшилаш мақсадида клиник диагностика хоналари, лаборатория, ЭКГ, УЗИ, марказий стерилизация, физиотерапия бўлимлари, шифокорлар учун санитария меъёрлари талабига жавоб берадиган замонавий хоналар, 8 ўринли кундузги шифохона ташкил этилди. Замонавий тиббий ускуна ва жиҳозлар билан таъминланди.
Оилавий поликлиникада марказлашган маълумотлар базаси, электрон амбулатор карталар ва касаллик тарихига эга тизим фаолияти йўлга қўйилди. Ҳудудда истиқомат қилувчи барча ёшдаги аҳоли яшаш жойи, уларнинг саломатлиги, қачон ва қайси масалада шифокорга мурожаат қилгани, касаллик тарихи, тиббий кўрик натижалари, шифокор томонидан берилган дорилар рецепти, боланинг эмлангани ва бошқа турли маълумотларнинг электрон шакли яратилмоқда.
Тизим автоматлаштирилган ҳолда рўйхатга олиш, ягона электрон амбулатор тиббий картани юритиш, аҳолига онлайн усулда, яъни уйдан чиқмасдан яшаш жойи бўйича оилавий поликлиника шифокори қабулига ёзилиш, фуқарога қулай вақтда тиббий хизмат олиш имконини бериши билан афзалдир. Энди беморлар оилавий поликлиникага келиб, навбат кутиб вақтини беҳуда сарфламайди. Онлайн тартибда ишловчи «Электрон поликлиника» автоматлашган ахборот тизими орқали қайси шифокорнинг қайси вақтда ишлашини билиб олиши ва электрон рўйхатга ёзилиши мумкин.
Изоҳ (0)