Инновацион ривожланиш вазирлигида иқтисодиётнинг турли соҳаларида халқаро миқёсда фаолият юритаётган ўзбекистонликлар томонидан ташкил этилган «Буюк келажак» экспертлар кенгаши аъзолари билан учрашув бўлиб ўтди. Бу ҳақда «Дарё»га вазирлик матбуот хизмати маълум қилди.
«Буюк келажак» экспертлар кенгашининг асосий мақсади Ўзбекистоннинг 2035 йилгача ривожланиш моделини ишлаб чиқишдан иборат. Шу муносабат билан 28—30 июнь кунлари кенгаш аъзолари «Ўзбекистон 2035» форумига йиғилиб, мамлакатнинг шу санагача бўлган ривожланиш концепцияси ва стратегиясини муҳокама қилди. Жумладан, давлат ва жамият бошқаруви тизимида демократик ислоҳотларни чуқурлаштириш, аҳолининг яшаш ва ижтимоий ҳимоя даражасини ошириш, иқтисодиётнинг рақобатбардошлигини ошириш ва макроиқтисодий барқарорликни кучайтириш, илм-фан, таълим ва инсон капиталини ривожлантириш каби масалалар форум кун тартибига қўйилди.
Вазирликка ташриф буюрган «Буюк келажак» экспертлар кенгашининг аъзолари Ойбек Шайхов, Илҳом Азимов, Наргис Дўстматова, Саиднўъмон Мансуров айни кунларда кенгаш томонидан Ўзбекистон ҳукумати ҳамда «Буюк келажак» экспертлар кенгаши ўртасида ҳамкорликни йўлга қўйиш бўйича механизмлар ишлаб чиқилаётганини билдирди. Кенгаш давлат органларига мамлакатда мавжуд муаммоларни ҳал қилиш юзасидан таклифлар, маслаҳатлар берувчи консултатив бюро сифатида фаолият юритиши назарда тутилган.
Инновацион ривожланиш вазирлиги мутахассислари «Буюк келажак» билан биргаликда ишлашга тайёр эканликлари, турли соҳаларда хорижий тажрибага эга экспертларнинг билим ва кўникмаларини вазирлик олдида турган вазифаларни амалга оширишда қўллаш зарурлигини таъкидлади. Ўз навбатида, Инновация вазирлиги ходимларининг аксарияти хорижда ўқиган ёки ишлаган, шу боис ҳам уларнинг кенгаш экспертлари билан бир-бирларини тушунишлари осон кечди. Икки томоннинг ҳамжиҳатликда ишлаши Ўзбекистон фаровонлигига, давлатнинг стратегик манфаатларига ҳисса қўшишига ишонч билдирилди.
Изоҳ (0)