Азизахон Ҳасанова 11 нафар фарзандлари ва набиралари билан Фарғона шаҳар Абдулла Қодирий МФЙ «Лолазор» маҳалласидаги 8-«А» уйнинг 53-хонадонида яшайди.
Уч нафар келинни икки хонали хонадонда муросага келтира олмаган А. Ҳасанова янги уй сўраб шаҳар ҳокимлигига бир неча бор мурожаат қилди. Натижада, жорий йилнинг 20 июнь куни шаҳар ҳокимининг кўрсатмаси билан унга Қиргули мавзеси Янги аср кўчаси 5-«В» уйдан ордер асосида икки хонали хонадон ажратилди. Далолатнома асосида уйни қабул қилиб олган аёл яхши ният билан тозалаш ва таъмирлаш ишларига киришди. 25 июнь куни уй ҳужжатларини сўраб борган А. Ҳасановага Фарғона шаҳар ҳокимлигининг хўжалик ҳисобидаги уй-жой бўлими бошлиғи А. Икромов томонидан вақтинчалик ижозат қоғози берилиб, қолган ҳужжатларни тез кунда расмийлаштириш ваъда қилинди.
Бироқ А. Ҳасанова янги уйга кўчиб киришга улгурмади. Мутасаддиларнинг ваъдалари бажарилмади, хонадон ҳужжатлари расмийлаштирилмади. Аксинча, шу куннинг ўзида Фарғона шаҳар ҳокимининг топшириғи билан ҳокимликнинг хўжалик ҳисобидаги уй-жой бўлими ва маҳалла фуқаролар йиғини масъуллари томонидан уй эшиги муҳрланди.
Шаҳар ҳокими нега ўз фикрини шунчалик тез ўзгартирди? А. Ҳасанова кимнинг арпасини хом ўрибдики, ундан уйни ўша куннинг ўзида қайтариб олишди? «Дарё» мухбири Азизжон Эрматов вазиятга ойдинлик киритиш мақсадида А. Ҳасанова билан учрашди.
– Ўша куни квартира бюросига бориб янги уйга ордер олиб келаётган эдим. Уйимиз олдида ишчи гуруҳи вакиллари ва телевидение ходимларига дуч келдим. 8-уйни сўрашди, кўрсатдим. Шундан кейин ҳамма қатори мени ҳам тасвирга олишди. Камчиликларни, муаммоларимни айтдим. Телевидение билан ишчи гуруҳ кетди. Кимдир тезда ҳокимга бориб, буларни Азиза опа бошлаб келди, деган. Кейин шаҳар ҳокими билан хўжалик ҳисобидаги уй-жой бўлими бошлиғи Аслбек келишди. Уйимга кириб кўришди. Шароитингиз яхши экан, деб берган уйларини олиб қўйишди. Шароитимнинг нимаси яхши, мана кўринглар. Шу уйда 12 киши яшай оладими? Битта келиним ажрашиб кетди, қолган иккитаси ҳам ота уйига кетиб қолган. Кўчлари қўшниларникида турибди. Энди нима қилишим керак? Кимга мурожаат қилай, дардимни кимга айтай? Агар ўша куни ишчи гуруҳ билан учрашмаганимда, камерага тушмаганимда, уйни қайтариб олишмасди, – дейди А. Ҳасанова.
Муаммо нимадалиги, уй нима учун шошилинч тарзда қайтариб олингани ойдинлашди. Шундай бўлса-да, мутасаддиларнинг муносабатини билиш мақсадида Фарғона шаҳар ҳокимлигининг хўжалик ҳисобидаги уй-жой бўлими бошлиғи ўринбосари билан учрашдик. Нима сабабдан А. Ҳасановага берилган уй муҳрлангани билан қизиқдик.
– Бошлиқ айтди, топшириқ бўлди деб. Печатлаб туринглар, кейинчалик масала ойдинлашсин, кейин хабарини берамиз дейишди. Бўлди, шу билан печатлаб қўйдик. Сабаби айтилмади. Бир кун олдин ўзимиз бориб, очиб бергандик уйни. Энди нима бўлади, билмайман. Хабарим йўқ, – дейди уй-жой бўлими бошлиғининг ўзини таништиришни истамаган ўринбосари.
Маълумки, Президент қарорига мувофиқ Фарғона вилоятида ҳам ҳудудлар 4 секторга бўлинган. Сектор раҳбарлари зиммасига ўзларига бириктирилган ҳудудларни иқтисодий, ижтимоий ривожлантириш, аҳоли муаммоларини ўрганиш ва уларга ечим топиш каби вазифлар юкланган. Афсуски, айрим сектор раҳбарлари буни ҳанузгача тушуниб етмаяпти, фаолиятида ўзгариш қилмаяпти. Аҳоли мурожаатлари ва муаммоларига лоқайд муносабатда бўлмоқда.
Шу боисдан, Шавкат Мирзиёев 12–13 июнь кунлари Фарғона вилоятига ташрифи чоғида секторлар раҳбарларига жиддий эътироз билдирди. Секторлар фаолиятини танқидий таҳлил қилиш, ҳудудлардаги ҳақиқий аҳволни ўрганиш бўйича Ҳисоб палатасига топшириқ берди.
Шундан сўнг Ҳисоб палатаси ишчи гуруҳи Фарғона шаҳридаги 4 та сектор фаолиятини ўрганди.
Фарғона шаҳридаги 20 та маҳалла, хусусан, А. Ҳасанова истиқомат қиладиган Абдулла Қодирий маҳалласи ҳам шаҳар ҳокими, 1-сектор раҳбари Шавкат Эркабоевга бириктирилган. Ҳисоб палатаси ишчи гуруҳи аъзолари маҳаллаларни ўрганишдан аввал сектор штаби фаолияти билан танишди, аҳоли мурожаатлари билан ишлаш жараёни, ҳужжатлар юритиш тартиби билан қизиқди.
Маълум бўлишича, штабда ишчи гуруҳнинг таркиби ва ўрганиш жадвали тасдиқланмаган, номенклатура тартибсиз жойлаштирилган. Далолатномаларда мурожаатларнинг ижроси таъминланганлиги келтирилмаган. Уйма-уй юриб ўрганилганини тасдиқловчи бирламчи ҳужжатларнинг барчаси умумий ва олди-қочди гапларга асосланган. Фуқароларнинг мурожаати натижалари тўғрисида ҳеч қандай ҳужжатлар расмийлаштирилмаган. Масалан, штаб ҳисоботида 14 июнь куни 22 та хонадон ўрганилгани айтилган. Лекин ўрганишлар бўйича кунлик маълумотлар мавжуд эмас.
Шундоққина штабининг ёнида, шаҳарнинг энг кўзга кўринган жойида ташландиқ ва хароб ҳолда фойдаланилмай ётган ҳудуднинг ўзи ҳам сектор раҳбари қай даражада «самарали» фаолият олиб бораётганини кўрсатиб турибди.
Ҳоким секторига бириктирилган Қашқарқишлоқ МФЙ 103-уйда яшовчи фуқаро Василжон Якубовнинг муаммоси ҳам мутасаддилар эътиборидан четда қолган. Уй эгасининг таъкидлашича, хонадон 7–8 ой аввал ёниб кетган. Уйда яшаш учун умуман шароит йўқ. Ҳовли хароб аҳволда. Василжон Якубовнинг айтишича, фарзандлари қўни-қўшниникида, ўзи эса товуқхонада яшаётган экан...
Ишчи гуруҳ Абдулла Қодирий маҳалласида жойлашган кўп қаватли уйлардаги аҳволни ҳам ўрганди.
Афсуски, бу ерда узоқ йиллар давомида йиғилиб қолган муаммолар қалашиб ётибди. Кўп қаватли уйлардаги вазият ниҳоятда ачинарли. Сув қувурларининг эскириб, ёрилиб кетиши натижасида ертўлалар захлаб кетган. Айрим уй йўлакларидаги электр шитлари очиқ ҳолатда. Томларни ёпиш, ертўла ва йўлакларни таъмирлаш, ички йўлларни асфальт қилиш, тўпланиб қолган чиқиндиларни белгиланган жойларга олиб чиқиб кетиш ишлари ўлда-жўлда. 8-«А» ва 8-«B» уйлар олдида болалар майдончаси йўқ.
Булар шаҳар ҳокими Шавкатжон Эркабоев масъул секторда яшовчи аҳоли муаммоларининг бир қисми, холос. Агар мутасадди раҳбарлар муаммоларни ўзига хос «йўл» билан – ишчи гуруҳга ёки телевидение мухбирларига дардини айтиб, арз қилган одамлардан аввал берган уйларини қайтариб олиш орқали «ҳал этаверса», вазият ижобий томонга ўзгармайди. Аксинча, уйма-уй юриб, муаммоларни вақтида бартараф этганларида, аҳвол бу қадар хунук тус олмаган бўларди.
«Дарё» бу мавзуга яна қайтади.
Изоҳ (0)