«Математикани билмаса ҳам майли, уларни ўзим грантга қабул қиламан». Шавкат Мирзиёев Техника университети талабасининг техник спорт турларини қўллаб-қувватлаш бўйича таклифини қабул қилди (видео)

Ўзбекистон Президенти Шавкат Мирзиёев раислигида 29 июнь куни Олмазор туманида бўлиб ўтган фаоллар йиғилишида бир қатор ёшлар ўз таклифлари билан Давлат раҳбарига мурожаат қилган. Улардан бири — Тошкент давлат техника университети талабаси авиамодель, ракетомодель, мотокросс, автокросс каби техник спорт турлари бўйича иқтидорли ёшларнинг олий таълим муассасаларига ўқишга киришида имтиёзлар беришни сўраган.

Йиғилишнинг ушбу қисмидан лавҳа «Ўзбекистон» телеканалининг «Таҳлилнома» дастурида намойиш этилди.

Талаба: — Тошкент давлат техника университети 4-босқич талабасиман. Таклифим — бизда «Ватанпарвар» ташкилоти бор, бу ташкилот спортнинг, хусусан, техник турларини ривожлантиради. Мен шу техник спорт турлари бўйича мураббийман. «Ватанпарвар» ташкилотида жуда ҳам кўп иқтидорли ёшлар бор. Авиамодель, ракетомодель, автокросс, мотокросс каби техник спорт турлари бўйича жаҳон чемпионатларида қатнашиб, совринли ўринларни эгаллаган болалар ҳам бор. Математика, физика фанлари бўйича билимлари бироз сустроқ бўлиши мумкин, лекин меҳнатсевар, яхши болалар. Шу муносабат билан, бундай ёшларнинг техника олийгоҳларига ўқишга кириши учун имтиёз яратиб берсак, жуда ҳам яхши бўларди

Шавкат Мирзиёев: — Нечта шундай боланинг рўйхатини бера оласан менга?

Талаба: — 10—15 нафар бола бор.

Шавкат Мирзиёев: — Ўйлаб, 20 нафар боланинг рўйхатини бер — мен қабул қилдим. Нимага? Яқинда, телевизорда кўрган бўлсаларинг, ҳамма ҳарбий қисмларда учрашувлар ўтказдим. Десантчи болалар билан учрашдим. Лекин битта фожиа — бизда десантларни тайёрлайдиган мактаблар йўқ. Бир вақтлар парашютнинг ўзи бўлмаган, вертолёт бўлмаган, вертолётга ёнилғи бўлмаган. Улар, кечирасизлар-у, машқларни ҳам оғзаки бажарган. Шунинг учун ҳозир биз жуда катта вертолётлар сотиб оляпмиз, самолётлар сотиб оляпмиз, парашютлар олиб келяпмиз. Мен олий таълимга ўша 20 нафар ёшнинг рўйхатини бераман. Улар математикани билмаса ҳам майли, садоқат билан хизмат қилса, уларни ўзим имтиҳонсиз грантга ўқишга қабул қиламан. Сен шу ёшларни топиб бер.