Ўзбекистонда жисмоний ва юридик шахсларга пуллик асосда автомашина ойналарини қорайтиришга (тонировка) рухсат бериш режалаштирилмоқда. Бу ҳақда ҳукумат қарори лойиҳасига таяниб, «Podrobno.uz» хабар берди.
Ҳужжат лойиҳасида енгил автомашиналарининг орқа ойналарини 5 фоиз ва орқа ён ойларини 30 фоизгача қорайтиришни белгилаш таклиф қилинмоқда.
Тонировка Давлат йўл ҳаракати хавфсизлиги тузилмалари томонидан 1 йил муддатга берилган рухсатнома асосида, тасдиқланган давлат стандартига мувофиқ ИИВ қошидаги «Инновацион лойиҳалар ва аҳолига хизмат сервис хизмат кўрсатиш маркази» ДУК томонидан амалга оширилади.
Машина олд ойнасининг тепа қисмида 14 сантиметрдан қалин бўлмаган ва ёруғлик ўтказиши 30 фоиздан кам бўлмаган полоса ўрнатиш учун рухсатнома талаб этилмайди.
Тонировкага рухсат бериш ва уни ўрнатиш учун тўлов ставкаси жисмоний шахслар учун энг кам ойлик иш ҳақининг 90, юридик шахслар учун 120, хорижий давлатларнинг юридик шахслар учун энг кам ойлик иш ҳақининг 140 баробар бўлади.
Машина ойнаси қорайтирилган хорижий давлатлар транспорт воситаларида Ўзбекистон ҳудудига кириш ва транзит ўтиш ҳолатларида 15 доллар миқдорида йиғим ундирилади.
Ички ишлар вазирлиги хизмат машиналари ойналарини қорайтириш рухсатномаси ва бепул ўрнатишга рухсат берилган давлат органлари рўйхатини тасдиқлайди.
Ҳужжатда пуллик тонировкага 2018 йил 1 июлидан рухсат берилиши белгиланган.
Изоҳ (0)