Ўзбекистон Қуролли Кучлари куч тузилмалари билан ҳамкорликда Мудофаа вазирлиги томонидан Тошкент шаҳридаги Мирзо Улуғбек тумани маҳаллаларида намуна сифатида ватанпарварлик тадбирлари ўтказилмоқда. Бунинг учун туманнинг 54 та маҳалласига масъул этиб Мудофаа вазирлиги марказий аппарати офицерлари бириктирилган, деб хабар беради вазирлик матбуот хизмати.
Мудофаа вазирлиги спорт мажмуасида Мирзо Улуғбек туманида жойлашган бир қатор маҳаллаларнинг ёшлари ўртасида спорт мусобақаси ўтказилди.
Вазирлик масъул офицерлари ҳамда маҳалла фаоллари, Ўзбекистон Ёшлар иттифоқи, давлат ва жамоат ташкилотлари ходимлари билан ҳамкорликда «Нодирабегим», «Феруза», «Олимлар», «Баҳор», «Катта олтинтепа», «Бўз», «Буюк Ипак йўли», «Алишер Навоий» ҳамда «Азамат» каби маҳаллаларда ёшларнинг вақтини мазмунли ўтказиш мақсадида ҳарбий ватанпарварлик руҳидаги тадбирлар ташкил этилди.
Жумладан, Алишер Навоий маҳалласида «Кўчма китоб ярмаркаси» ва болалар учун мўлжалланган миллий ва жаҳон адабиёти намуналаридан иборат китоб тақдимоти бўлиб ўтди, асарлардан парчалар ўқиб эшиттирилди.
Болалар билан расм чизиш, пластилиндан ўйинчоқлар ясаш, шахмат-шашка ўйинлари, спортнинг сузиш, мини футбол каби турлари бўйича тадбирлар болажонларга шодлик улашди. Мини футбол бўйича ўтказилган спорт мусобақасида «Нодирабегим» маҳалласи ғолибликни қўлга киритди. «Олимлар» ва «Баҳор» маҳалла ёшлари таркибидан тузилган ёшлар жамоасига иккинчи ва учинчи ўринлар насиб этди.
Шунингдек, тумандаги «Асака» ҳамда «Подшобоғ» маҳаллаларида ёшларни ватанпарварликка ундовчи тадбирлар ўтказилган бўлса, «Ҳамид Олимжон» маҳалласида истиқомат қилувчи нафақадаги офицернинг ҳовлисида ободонлаштириш ишлари амалга оширилди.
Эслатиб ўтамиз, 2018 йилнинг 23 февралида Вазирлар Маҳкамасининг 140-сонли қарори билан Ёшларни ҳарбий-ватанпарварлик руҳида тарбиялаш концепцияси кучга кирган эди.
Изоҳ (0)