Бугун, 28 июнь куни ўз ишини бошлаган Олий Мажлис Сенатининг ўн бешинчи ялпи мажлисида «Медиация тўғрисида»ги Ўзбекистон Республикаси қонуни маъқулланди. Бу ҳақда «Дарё» мухбири Севара Нишонова хабар бермоқда.
Қонун юзасидан Сенатнинг Қонунчилик ва суд-ҳуқуқ масалалари қўмитаси раиси ўринбосари Толибжон Мадумаров маъруза қилди. Медиациянинг мақсади — низолашувчи тарафларнинг низоларини мустақил, ўзаро фойдали шартлар асосида ҳал этиш имкониятини топишга кўмаклашишдан иборат бўлиб, унинг асосий тамойилларига ихтиёрийлик тарафларнинг тенглиги, медиаторнинг холислиги, махфийлик кабилар киради.
Бугунги кунда Ўзбекистонда медиацияга ўхшаш яраштирув процедуралари турли низоларни ҳал этишда қўлланилмоқда. Фуқароларнинг ўзини ўзи бошқариш органлари томонидан низолашаётган тарафларни (қўшнилар ўртасидаги низолар, оилавий низолар) яраштириш фаолиятини ҳам медиация намоёни сифатида кўриш мумкин.
Ўзбекистонда аввалдан маҳалла оқсоқоли қўшнилар, оила аъзолари, эр-хотин ўртасидаги низоларни ҳал этиш вазифасини бажарган. Аммо ушбу процедуралар «медиация» термини билан аталмайди. «Медиация тўғрисида»ги қонун 4 боб ва 34 та моддадан иборат. Қонунга мувофиқ, унинг амал қилиши фуқаролик ҳуқуқий муносабатлардан, шу жумладан тадбиркорлик фаолиятини амалга ошириш муносабати билан келиб чиқадиган, шунингдек якка меҳнат низолари ва оилавий ҳуқуқий муносабатлардан келиб чиқадиган низоларга медиацияни қўллаш билан боғлиқ муносабатларга нисбатан, агар қонунда бошқача қоида назарда тутилмаган бўлса, татбиқ этилади.
Қонуннинг 25 та моддасида медиацияни қўллаш чоғидаги чекловлар белгиланган бўлиб, бу келгусида келиб чиқиши мумкин бўлган низоларнинг олдини олишга хизмат қилади.
Изоҳ (0)