Pepsi Суперлиганинг қолдирилиган 14-тур учрашувлари ўтказиладиган саналар маълум бўлди

Профессионал футбол лигаси Sport-TV телеканали билан келишган ҳолда Pepsi Суперлиганинг 16-тури вақтлари ҳамда 14-тур беллашувларининг санаси ҳамда вақтларига ойдинлик киритиб олди, деб хабар беради ПФЛ матбуот хизмати.

Маълумот учун 14-тур Ўзбекистон термасининг Уругвайга қарши ўртоқлик ўйини сабаб қолдирилганди.

Унга кўра 16-тур беллашувлари аввалдан белгилаб қўйилганидек, 8—9 июль кунлари бўлиб ўтади. Бунда об-ҳавонинг иссиқлигидан келиб чиқиб, ўйинларнинг 19:00 дан эрта бошланмаслигига эътибор қаратилган.

Ўзбекистон Кубоги форматига кичик ўзгартириш киритилгани ҳақида маълум қилинганди. Режага кўра, чорак финал ўйинлари 12—13 июль кунлари ўтказилиши керак эди. Энди эса кубок баҳслари кузга қолдирилган:1/4 финалга қуръа ташлаш маросими 9 июль куни бўлиб ўтади ва у «Спорт» телеканалида жонли кўрсатилади. Режага кўра қуръа маросимига «Миллий стадион» мезбонлик қилади. Маросим «Бунёдкор» — «Қизилқум» ўйини танаффусида бўлиб ўтиши режалаштирилган.

Уругвайга қарши ўртоқлик ўйини сабаб қолиб кетган 14-тур эса эндиликда 12—13 июль кунлари бўлиб ўтади (кубокнинг чорак финал учун режалаштирилган санасида).

22-тургача бўлган ўйинлар тақвими эса тез орада маълум қилинади. Бунда Профессионал футбол лигаси ЎФА ҳамда МОҚ раҳбариятининг Осиё Ўйинлари бўйича талабидан келиб чиқиб, ўйинлар саналарига ўзгартириш киритади, дейилади хабарда.