Ўзбекистоннинг Малайзиядаги элчихонаси томонидан «Ўзбекистон—Малайзия: савдо-инвестициявий ҳамкорликнинг янги уфқлари» мавзусида бизнес-семинар ташкил этилди. Унда ҳамкор мамлакатнинг 15 га яқин корпорация ва компаниясидан 30 дан зиёд вакил иштирок этди, деб ёзади ЎзА.
Семинарда малайзиялик ишбилармонларга Ўзбекистонда амалга оширилаётган кенг кўламли ислоҳотлар, инвесторлар учун яратилаётган қулай ишбилармонлик муҳити, тадбиркорлик фаолиятини рағбатлантириш мақсадида таклиф этилаётган солиқ ва божхона имтиёзлари ҳақида сўзлаб берилди. Мамлакатда етиштирилаётган сархил мевалар, қишлоқ хўжалиги маҳсулотларини Малайзияга экспорт қилиш масалалари юзасидан атрофлича фикр алмашилди.
Мулоқот чоғида Silverlake Group Sdn Bhd компанияси директори Редзуан Кушаири барча турдаги электрон давлат хизматларини кўрсатишни йўлга қўйиш, хизматлар учун онлайн тўлов қилиш имконини берадиган «Рақамли иқтисодиёт маркази»ни ишга тушириш ва мобил иловалар орқали тўлов тизимини янада ривожлантиришга оид бизнес ишланмаларини тақдим этди. Лойиҳани дастлабки босқичда амалга ошириш учун 50 миллион АҚШ доллари миқдорида тўғридан-тўғри хорижий инвестиция жалб этилиши кўзда тутилган.
Тадбирда саноат, ишлаб чиқариш, сервис, хизмат кўрсатиш соҳаларида қўшма лойиҳаларни ишлаб чиқиш ва татбиқ этишга доир таклифлар билдирилди. Хусусан, Serbo Dinamik Sdn Bhd компанияси вице-президенти Палендран Палачандран Ўзбекистонда каустик сода ишлаб чиқаришни йўлга қўйиш, нефть ва газ қувурларини таъмирлаш бўйича технопарклар ташкил этиш мақсадида 80 миллион АҚШ доллари миқдорида сармоя киритишни режалаштираётганини маълум қилди.
Monarch Aesthetic Sdn Bhd косметик маҳсулотлар ишлаб чиқариш соҳасида дунёда етакчилардан. Айни пайтда Ўзбекистонда компания билан Monarch Holdings қўшма корхонаси ташкил этилган. Музокараларда ҳамкорликни кенгайтириш юзасидан фикр алмашилди.
Малайзиянинг Frasers Hospitality Hotel меҳмонхоналар тармоғи департаменти директори Жеффри Муҳаммад Ўзбекистоннинг сайёҳлик салоҳиятини юқори баҳолаб, Тошкент, Самарқанд ва Бухоро шаҳарларида уй-меҳмонхоналарни оммалаштириш истагида эканини қайд этди.
Тадбир сўнггида ҳамкорликнинг келгуси истиқболларини муҳокама қилиш мақсадида Малайзиянинг етакчи фирма ва компаниялари вакилларининг мамлакатга ташрифини ташкиллаштиришга келишиб олинди.
Изоҳ (0)