Жарқўрғон туманидаги «Agro peanut trade» агрофирмаси БАА билан 78 минг долларга тенг 130 тонна мошга «Kwok luen trading Co» корхонаси эса Хитойга 117 минг долларга тенг миқдорда мош етказиб бериш мақсадида шартнома имзолаган эди. Айни вақтда келишилган маҳсулотлар тўлиқ етказиб берилди, деб хабар беради ЎзА.
«Сурхон экспорт импорт» агрофирмаси Россиянинг «Агро юг» корхонаси билан қишлоқ хўжалиги маҳсулотлари етказиб бериш борасида 15 миллион долларга тенг шартнома имзолаган эди. Апрель, май ойларида 200 минг доллар миқдорида маҳсулотлар экспорт қилинди. Йил бошидан буён корхона 2 миллион 778,8 минг долларлик қишлоқ хўжалиги маҳсулотлари экспортини амалга оширди.
Албатта, экспорт ҳажмининг ортишида Сурхон воҳасининг ҳар бир туманида Ўзмиллийбанк Тошкент шаҳар бош бошқармаси филиаллари, Кичик бизнес ва хусусий тадбиркорлик субъектлари экспортини қўллаб-қувватлаш жамғармаси иштирокида агрофирмалар ташкил этилгани қўл келди.
«Албатта бундай жараёнлар ўз-ўзидан бўлаётгани йўқ. Ваҳоланки, агрофирмаларга четдан харидор топиш ҳамда шартномалар имзолаш ҳамда бошқа молиявий кўмак кўрсатишда жамғармамиз яқиндан кўмак бермоқда. Хусусан, биз ҳудуд корхоналарига мамлакатимиз ва чет элларда ўтказилаётган йирик халқаро кўргазма-ярмаркалар, бизнес-форум ва кооперацион биржаларда иштирок этиб, харидорлар топиш ва шартномалар тузиш, экспорти жўғрофиясини кенгайтириш борасида тегишли маънавий ва моддий маслаҳатлар бераётирмиз. Халқаро тадбирларда уларнинг иштирокини таъминламоқдамиз», – дейди Кичик бизнес ва хусусий тадбиркорлик субъектларининг экспортини қўллаб-қувватлаш жамғармаси бўлим бошлиғи Олимжон Рўзиев.
Изоҳ (0)