Япониянинг Осака префектурасидаги кучли зилзила оқибатида ҳалок бўлганлар сони тўрт кишига етди. Бу ҳақда маҳаллий ҳукумат вакилларига таяниб, NHK телеканали хабар бермоқда, деб ёзади «РИА Новости».
Телеканалнинг маълум қилишича, 18 июнь, душанба оқшомида Осака префектураси Такацуки шаҳрининг 81 ёшли фуқароси ҳалок бўлганлиги тасдиқланди. Аввалроқ уч киши, жумладан, тўққиз ёшли қизалоқнинг ҳалок бўлганлиги хабар қилинган эди.
Эслатиб ўтамиз, 18 июнь тонгида Осака префектурасида 6,1 магнитудали ер силкиниши юз берди. Ерости силкинишлари маҳаллий вақт билан 07:58 да қайд этилди.
Охирги маълумотларга кўра, 358 киши турли даражадаги оғирликдаги жароҳатлар олган.
Зилзила оқибатида Япониянинг 100 мингдан ортиқ оиласи газсиз қолди, 110 минг хўжаликда электр таъминоти тўхтаган. Ер силкиниши темирйўл транспорти фаолиятида узилишларга олиб келган. Метрополитен ва шаҳар темирйўлларининг бир қисми зилзиладан 12 соат ўтиб очила бошлаган. Осакадаги Кансай халқаро аэропортида самолётлар парвози ва қўниши вақтинчалик тақиқланган. Бутун префектура бўйлаб 391 та вақтинчалик жойлаштириш пункти ташкил этилган.
Изоҳ (0)