Самарқанддаги хусусий туғуруқхонада чақалоқлар савдоси билан шуғулланиб келинган. Сотилмай қолганлари эса ёқиб юборилган
Самарқанд шаҳридаги хусусий туғуруқхонада сунъий аборт йўли билан туғилган чақалоқлар савдоси билан шуғулланиб келингани аниқланди. Бу ҳақда «Ҳуқуқ» газетасига таяниб, UzNews маълум қилди.
Шифохона ходимлари чақалоқларни сохта ҳужжатлар билан 500 дан 2000 долларгача бўлган нархларда фарзандсиз оилаларга пуллаган.
Сотилмай қолган гўдаклар нобуд қилинган. Чақалоқларнинг жонсиз таналари эса тиббий чиқиндиларни ёқишга мўлжалланган муфел печида ёқиб юборилган.
Мазкур ҳолат бўйича вилоят прокуратураси томонидан Жиноят кодексининг бир қанча моддалари билан жиноят иши қўзғатилди.
Жиноят ишлари бўйича Самарқанд вилояти судида туғуруқхона маъмурияти ҳамда ходимларига ҳукм ўқилиб, шифохонанинг бош шифокори Нигора Солихонова 13 йил ва 2 ойга озодликдан маҳрум этилди.
Озодликдан маҳрум этилиш кўринишидаги жазо туғуруқхонанинг бошқа ходимларига нисбатан ҳам қўлланди.
