Фазлиддин Ғоибназаров: Агар боксда қўрқув сезадиган бўлсанг, фаолиятингни якунлаб қўйганинг яхшироқ

Рио—2016 Олимпиадаси чемпиони Фазлиддин Ғоибназаров профессионал боксдаги 5-жангини 14 июль куни АҚШда ўтказиши ҳақида хабар берилган эди.

«Лакефронт Арена» саройи мезбонлик қиладиган жанг оқшомида ўзбекистонлик боксчи ақшлик Кевин Жонсонга қарши рингга кўтарилади.

Миллий олимпия қўмитаси матбуот хизмати эса Фазлиддин билан боғланиб, унинг жангга тайёргарлик жараёни билан қизиқди.

«Жангга Калифорнияда тайёргарлик кўряпмиз. Мураббийим Аброр Турсунпўлатов билан ишлаяпман. Олдинда бир ойлик машғулотлар кутиб турибди. Спарринг жангларни бошлаганмиз. Машғулот жанглари мексикалик ва америкалик боксчиларга қарши ўтказилмоқда. Шунингдек, қозоғистонлик рақиб ҳам машғулотларда мен билан бирга ишлайди. Машғулотлардаги рақибларимнинг барчаси баланд бўйли ва асосан ўнг қўлда жанг қилади. Кевин Жонсоннинг бундан олдинги жангларини ўрганиб чиқаяпмиз. Унинг нозик томонларини топишга ҳам улгурдик. Тайёргарлик жараёнида бу томонлар ҳам инобатга олинади.

Рақибнинг кўрсаткичи мени қўрқитаётгани йўқ. Агар боксда қўрқув сезадиган бўлсанг, фаолиятингни якунлаб қўйганинг яхшироқ. Рингга ўз кучингга юқори ишонч билан чиқиш лозим. Мен доимо шу тарзда жангга чиқаман. Ортимда бутун мамлакат турганини, мени қўллаб-қувватлаётганини биламан. Бу менга янада кўпроқ куч бағишлайди», —дейди Фазлиддин Ғоибназаров.

Маълумот учун Фазлиддин Ғоибназаров бунга қадар профессионал боксда 4 та жанг ўтказган ва уларнинг барчасида ғалаба қозонган (2 тасида нокаут билан). Жонсон эса бунгача 5 та жангда рингга чиққан ва уларнинг барчасида рақибларини мағлуб этган (4 таси нокаут).