Европа тикланиш ва тараққиёт банки Россияга кредит беришни қайта тиклашни режалаштирмаяпти, аммо Ўзбекистоннинг узоқ вақтлар давомида ортга сурилган бозор ислоҳотларини амалга ошириш қароридан кейин, Марказий Осиёга нисбатан оптимистик кайфиятда. Бу ҳақда банк президенти Сума Чакрабарти Reuters’га берган интервьюсида айтиб ўтди, деб ёзади Spot.
Банк Россияга кредитлар ажратишни 2014 йилда Москванинг Украинадаги низолардаги иштироки туфайли тўхтатиб қўйган эди, Чакрабарти ЕТТБнинг бу борадаги позицияси ўзгармаганини айтди.
Чакрабарти Остонанинг Шенген визасининг осиёча варианти — Silk viza’ни яратиш таклифини маъқуллади.
Унинг сўзларига кўра, банк ўтган йили Ўзбекистонга 100 миллион евродан ортиқ маблағ киритган ва келажакка кўплаб лойиҳаларни режалаштирган.
Чакрабартининг қўшимча қилишича, мамлакатни ривожлантириш стратегияси устидаги ишларни якунлаш учун Тошкентга сентябрда ташриф буюришни режалаштирмоқда, стратегияни ЕТТБ бошқарувчилар кенгаши шундан кейин бир ой ўтиб маъқуллаши керак.
Тошкент томонидан хусусийлаштирилиши мумкин бўлган соҳалар ҳақида гапирар экан, у банк сектори биринчилардан бўлиб очилиши муҳим эканлигини, чунки бу ресурсларни самарали тарзда йўналтириш имконини беришини айтди.