Тошкент шаҳрида «Марказий Осиёда қишлоқ хўжалиги соҳасидаги ўзгаришлар, озиқ-овқат маҳсулотлари ва озиқланиш хавфсизлиги» мавзуида халқаро конференция ташкил этилди. Бу ҳақда «Халқ сўзи» хабар берди.
Тошкент шаҳридаги халқаро Вестминстер университети ҳамда Халқаро озиқ-овқат сиёсати илмий тадқиқот институти (IFPRI) ҳамкорлигида ўтказилган ушбу анжуманда Ўзбекистон Республикаси Қишлоқ, Сув хўжалиги ва Соғлиқни сақлаш вазирликлари, халқаро ташкилотлар вакиллари қатнашди.
«Мазкур анжуман Ўзбекистонда биринчи марта ташкил этилмоқда. Институт томонидан ушбу мавзу доирасидаги ҳисоботлар Рим, Токио, Москва каби дунёнинг 14 та давлатида тақдим этиб келинади. 2018 йилги Глобал озиқ-овқат сиёсати бўйича ҳисобот айнан Тошкент шаҳрида тақдим этилиши ҳам бежиз эмас. Зеро, Ўзбекистон ўзининг озиқ-овқат хавфсизлигини таъминлашдан ташқари, маҳсулотларини экспорт қилиш орқали ҳам хорижий давлатларнинг озиқ-овқат таъминотига катта ҳисса қўшаётгани халқаро ҳамжамият томонидан эътироф этилмоқда. БМТ Озиқ-овқат ва қишлоқ хўжалиги ташкилотининг 2015 йили Римда бўлиб ўтган 39-конференциясида Минг йиллик ривожланиш мақсадларига эришган мамлакатларни тақдирлаш маросимида Ўзбекистон 14 та давлат қаторида озиқ-овқат хавфсизлигини таъминлашда эришган ютуқлари учун махсус мукофот билан тақдирлангани фикримиз тасдиғидир », — дейди Вашингтондаги Халқаро озиқ-овқат сиёсати илмий тадқиқот институти бош директори Шенген Фан.
Конференцияда қишлоқ хўжалиги ва озиқ-овқат маҳсулотлари тизимининг таркибий ўзгаришлари, унинг озиқланишдаги аҳамияти, Марказий Осиёда қишлоқ хўжалиги ва озиқ-овқат маҳсулотлари савдоси, рақобатдошлигини таъминлаш масалалари муҳокама қилинди.
Изоҳ (0)