Жаҳон Чемпионати учрашувларини бошқариш бўйича рекорд соҳиби (9 та ўйин) Равшан Эрматов бугун, 2 июнь куни ёрдамчилари Абдуҳамидулло Расулов ва Жаҳонгир Саидов билан бирга Россияга йўл олади, деб ёзади ЎФА.
Мундиал сафари олдидан Ўзбекистон футбол ассоциациясида Миллиий Олимпия қўмитаси президенти ва ЎФА биринчи вице-президенти Умид Аҳмаджонов Равшан Эрматов ва унинг гуруҳини қабул қилиб, уларга оқ йўл тилади. Ўз ўрнида Равшан Эрматов ва унинг бригадаси кўрсатилган эътибор ва ишонч учун катта миннатдорчилик билдириб, ўзбек ҳакамларининг савиясини бутун дунёга яна бир бор кўрсатиш учун Жаҳон Чемпионатида бор маҳоратини ишга солишга ваъда берди.
Таъкидлаш жоиз, Россиядаги Жаҳон Чемпионатида Равшан Эрматов бригадасидан ташқари, комиссар сифатида Олим Арифов ҳамда ҳакамлар назоратчиси сифатида эса Фарҳод Абдуллаев ҳам иштирок этади. Ўзбек футболи тарихида биринчи марта Жаҳон Чемпионатида бош ҳакам, лайнсменлар, ҳакамлар назоратчиси ва учрашув комиссари тўлиқ таркибда ишлайди.
Изоҳ (0)