Туризмни ривожлантириш давлат қўмитаси, «Ўзбеккино» миллий агентлиги ҳамда Ўзбекистонниг Ҳиндистондаги элчихонаси ҳамкорлигида ҳинд юлдузлари видеоклипларини Ўзбекистонда суратга олиш масаласи кўриб чиқилди. Бу ҳақда қўмита матбуот хизмати маълум қилди.
Май ойининг биринчи ярмида Арко Право Мукержи бошчилигидаги мусиқа гуруҳининг 2 клипи суратга олинди. Арко — хонанда, бастакор, бир неча хит қўшиқлар муаллифи. Унинг «Жисм 2» блокбастери учун ёзилган саундтреклари 50 миллиондан ортиқ марта кўрилган.
Хонанданинг қўшиқларини суратга олиш жараёнида маслаҳатчи ва бош оператор вазифасида Шуҳрат Қаюмов қатнашди.
Ўзбекистонга ташриф ҳинд юлдузининг Facebook, Twitter ва Instagram’даги саҳифаларида ёритилди. Видеоклиплар эса ҳинд телеканаллари ва Youtube’даги расмий каналлар орқали намойиш этилади.
Мазкур лойиҳанинг кейинги меҳмонлари Мeet Bros гуруҳи ҳамда хонанда ва актриса Каника Капур бўлади. Ушбу ижодкорларнинг видеоклиплари интернет сайтлари орқали 200 миллиондан ортиқ маротаба кўрилган.
Қўмитага кўра, Болливуд юлдузлари билан ўзаро яқин ҳамкорлик Ҳиндистонда, шунингдек, бир неча миллионлик ҳинд диаспоралари бўлган Ғарбий Европа ва АҚШда Ўзбекистоннинг туризм салоҳиятини тарғиб этишда муҳим аҳамиятга эга.
Изоҳ (0)