Араб давлатлари лигаси (АДЛ) доимий вакиллар даражасида Қоҳирада ўтказилган мажлис давомида панараб ташкилотига аъзо давлатлар ТИВ раҳбарлари эътиборига тақдим этиладиган резолюция лойиҳасини маъқуллади, деб ёзади Sputnik Саудия Арабистонининг АДЛдаги доимий вакили Усама Наклига таяниб.
«Бугун 17 май, пайшанба куни ТИВ раҳбарлари фавқулодда мажлисида кўриб чиқиладиган ва қабул қилинадиган резолюция лойиҳаси ишлаб чиқилди ва бир овоздан маъқулланди», — деди саудиялик дипломат. Шу билан бирга у резолюция тафсилотларини очиқламади ва фақатгина ҳужжат араб давлатларининг Қуддус бўйича барчага маълум бўлган позициясига асосланганлигини қайд этиб ўтди.
АДЛнинг расмий вакили Ҳусам Закий ўз навбатида, ташкилот котибиятига АҚШнинг элчихонани Қуддусга кўчириш бўйича қарорига қарши туриш учун қатор чоралар мажмуини ишлаб чиқиш топширилганини маълум қилган.
Араб давлатлари лигаси АҚШ элчихонасининг Қуддусга кўчирилиши, шунингдек, оммавий норозилик намойишларидан кейин Ғазо секторидаги вазият юзасидан 16 май куни ташкилотга аъзо мамлакатларнинг доимий вакиллари даражасида навбатдан ташқари мажлисни ўтказди. 17 май куни Қоҳирада араб давлатлари ташқи ишлар маҳкамалари раҳбарлари тўпланади.
Илгарироқ панараб ташкилоти Исроил армияси томонидан фаластинлик намойишчиларга қарши куч ишлатилишини кескин қоралаб, Вашингтоннинг элчихонани кўчириш бўйича ҳаракатларини ноқонуний деб атаган эди.
Изоҳ (0)