Arab davlatlari ligasi (ADL) doimiy vakillar darajasida Qohirada o‘tkazilgan majlis davomida panarab tashkilotiga a’zo davlatlar TIV rahbarlari e’tiboriga taqdim etiladigan rezolyutsiya loyihasini ma’qulladi, deb yozadi Sputnik Saudiya Arabistonining ADLdagi doimiy vakili Usama Nakliga tayanib.
“Bugun 17-may, payshanba kuni TIV rahbarlari favqulodda majlisida ko‘rib chiqiladigan va qabul qilinadigan rezolyutsiya loyihasi ishlab chiqildi va bir ovozdan ma’qullandi”, — dedi saudiyalik diplomat. Shu bilan birga u rezolyutsiya tafsilotlarini ochiqlamadi va faqatgina hujjat arab davlatlarining Quddus bo‘yicha barchaga ma’lum bo‘lgan pozitsiyasiga asoslanganligini qayd etib o‘tdi.
ADLning rasmiy vakili Husam Zakiy o‘z navbatida, tashkilot kotibiyatiga AQShning elchixonani Quddusga ko‘chirish bo‘yicha qaroriga qarshi turish uchun qator choralar majmuini ishlab chiqish topshirilganini ma’lum qilgan.
Arab davlatlari ligasi AQSh elchixonasining Quddusga ko‘chirilishi, shuningdek, ommaviy norozilik namoyishlaridan keyin G‘azo sektoridagi vaziyat yuzasidan 16-may kuni tashkilotga a’zo mamlakatlarning doimiy vakillari darajasida navbatdan tashqari majlisni o‘tkazdi. 17-may kuni Qohirada arab davlatlari tashqi ishlar mahkamalari rahbarlari to‘planadi.
Ilgariroq panarab tashkiloti Isroil armiyasi tomonidan falastinlik namoyishchilarga qarshi kuch ishlatilishini keskin qoralab, Vashingtonning elchixonani ko‘chirish bo‘yicha harakatlarini noqonuniy deb atagan edi.
Izoh (0)