Айни вақтда Hi-Tech Bank хусусий акциядорлик тижорат банкига нисбатан ҳуқуқ-тартибот ва назорат органлари томонидан ҳеч қандай текширувлар амалга оширилмаяпти. Бу ҳақда UZ24 нашри банк маъмуриятига асосланиб маълум қилди.
Аввалроқ, Бош прокуратура Hi-Tech Bank номи тилга олинган хабарни эълон қилганди. Унда икки нафар фуқаро фирибгарлик йўли билан Hi-Tech Bank’нинг мансабдор шахсларидан 500 минг доллар олганлиги ёзиб ўтилган. Бунинг эвазига улар ўтказилган текширишларда аниқланган камчиликларни камайтириб кўрсатиш ҳамда уларга нисбатан эҳтиёт чораси сифатида қамоққа олиш чорасини қўлламасдан, енгиллик беришни ваъда қилган.
Бу воқеа айнан қачон содир бўлганлиги Бош прокуратуранинг хабарида аниқлик киритилмаган.
«Ҳозирги акциядор ва банк раҳбарияти Бош прокуратура хабарида баён этилган далил ва ҳужжатлардан бехабар», — дейилади банкнинг расмий баёнотида.
Банк маъмуриятининг таъкидлашича, 2016 йилда Hi-Tech Bank’нинг акциядорлар ва раҳбар шахслари таркиби тўлиқ ўзгарган. Шунингдек, акциядорлар таркибига хорижлик инвесторлар ҳам жалб этилган.
«Ушбу вақтдан бери банкка нисбатан ҳуқуқ-тартибот органлари томонидан текширувлар амалга оширилмади ва банк ходимларига нисбатан жиноят иши қўзғатилмаган», — дея таъкидланади баёнотда.
Изоҳ (0)