АПЛда голлар шоуси. «Арсенал» «Вест Ҳэм» дарвозасига 4 та гол урди, «Манчестер Сити» эса чемпионликни 5 та гол билан нишонлади (видео)

Англия премьер лигаси 35-тури доирасида бугун, 22 апрель санасида учта учрашув бўлиб ўтди.

Уларда бири Лондонда «Арсенал» ҳамда «Вест Ҳэм» жамоалари ўртасида кечди. Лондон дербиси мақомини олган мазкур учрашувда ўйин тақдири иккинчи бўлимга келибгина ҳал этилди. 51-дақиқада Начо Монреаль ҳисобни очган бўлса, «Вест Ҳэм» орадан 13-дақиқа ўтиб, Марко Арнаутовичнинг голи билан мувозанатни тиклади. Аммо «Арсенал»ни 82-дақиқа киритган голидан кейин тўхтатиб қолишнинг иложиси бўлмади. «Канонирлар» 7 дақиқа ичида меҳмонлар дарвозасини 3 бор ишғол этиб, йирик ҳисобдаги ғалабни тантана қилишди.

«Сток Сити» «Бёрнли» ўртасидаги учрашувда эса 1:1 ҳисоби қайд этилди.

Ўтган турда АПЛ чемпионлигини қўлга киритган Хосеп Гвардиола шогирдлари ўз майдонида «Суонси Сити»ни қабул қилиб, 5:0 ҳисобида ғалаба қозонди. Шу тариқа «Манчестер Сити» чемпионликни ғалаба билан нишонлади.