Давлат молиявий назорат бош бошқармаси ва унинг ҳудудий бошқармалари биринчи чоракда 844 марта назорат тадбирларини ўтказди. Бу ҳақда Молия вазирлиги матбуот хизматига таяниб, «Газета.uz» хабар берди.
Уларнинг 661 тасида 33 миллиард сўмлик бюджет интизоми бузилиши ҳолатлари, жумладан, 5,1 миллиард сўмнинг ўзлаштирилиши ва талон-тарож қилиниши, 24,8 миллиард сўмнинг ноқонуний сарфланиши ҳамда Молия вазирлиги қошидаги жамғармалар маблағларининг 3,2 миллиард сўмлик маблағларидан мақсадсиз фойдаланиш ҳолатлари аниқланди.
Текширувлар натижасида 20,8 миллиард сўмлик маблағлар қайта тикланди. 650 та назорат тадбири бўйича материаллар ҳуқуқий баҳо бериш учун ҳуқуқни муҳофаза қилиш органларига тақдим этилди.
Бюджет ташкилотларининг бюджет интизомини бузган 32 нафар мансабдор шахси маъмурий жавобгарликка ва 16,7 миллион сўм миқдорида жаримага тортилди.
Ҳукумат кафолатлаган кредитлар, Болалар спортини ривожлантириш жамғармаси ва бошқа йўналишлардаги кредитлар бўйича 27 та назорат тадбири ўтказилган бўлса, 22 та ҳолатда 1,3 миллиард сўмлик талон-тарож ҳолатлари аниқланган. Ушбу маблағларнинг 1,1 миллиард сўми қайтарилган. 1,2 миллиард сўмлик 18 та материал ҳуқуқни муҳофаза қилиш органларига тақдим этилган.
Ҳисобот даврида Давлат молиявий назорат бошқармасига жисмоний шахслардан 199 та мурожаат келиб тушган. Жисмоний шахслар мурожаатлари бўйича ўтказилган назорат тадбирларида 98 миллион сўмлик молиявий қонун бузилишлари аниқланиб, 13 та материал ҳуқуқ-тартибот органларига тақдим этилган.
Изоҳ (0)