Ўзбекистон Республикаси Вазирлар Маҳкамасининг 2017 йил 11 октябрдаги «Ўзбекистон Республикаси Қуролли Кучлар сафида муддатли ҳарбий хизматни ўтаётган ҳарбий хизматчиларнинг маънавий-маърифий, маданий савияси ва билимларини мунтазам ошириб бориш тизимини такомиллаштиришга доир қўшимча чора-тадбирлар тўғрисида»ги 812-сон қарорига мувофиқ ҳарбий хизматчиларнинг олий таълим муассасаларига ўқишга киришга тайёргарлик кўришлари учун ўтказиладиган машғулотлар якунида фан йўналишларида танловлар ўтказиш бўйича низоми кучга кирди, деб «Дарё»га хабар беради Мудофаа вазирлиги матбуот хизмати.
Унга кўра, олий таълим муассасаларига ўқишга киришга тайёргарлик кўришлари учун ўтказилган машғулотлар якунида фан йўналишлари бўйича аниқланган энг сара муддатли ҳарбий хизматчилар вилоят миқёсида ташкил этиладиган танловда иштирок этади. Танлов бешта фан йўналиши бўйича (аскарлар томонидан танлаб олинган) ташкил этилади ҳамда ҳар бир фан йўналиши бўйича биттадан ғолиб аниқланади. Ғолиблар икки босқичда, оғзаки ҳамда ёзма (ижодий иш) топшириқларининг баҳоланиши орқали аниқланади. Шунингдек, бунда ҳарбий хизматчилар томонидан жанговар ва маънавий-маърифий тайёргарлик машғулотларида тўплаган рейтинг баллар ҳамда Ўзбекистон Республикаси Вазирлар Маҳкамаси ҳузуридаги Давлат тест маркази томонидан ўтказиладиган якуний тест синов натижалари ҳам ҳисобга олинади.
Танлов якуни бўйича ғолиб бўлган муддатли ҳарбий хизматчиларга Республикадаги олий таълим муассасаларига ўқишга кириш имтиёзи берилади.
Эслатиб ўтамиз, юқорида номланган қарор талабларига мувофиқ Мудофаа вазирлиги қўшинларида фанлар йўналишлари бўйича машғулотлар бошланган бўлиб, улар Олий ва ўрта махсус таълим ҳамда Халқ таълими вазирликларининг ўқитувчилари томонидан ҳарбий қисмларда ҳафтанинг душанба, чоршанба ва жума кунлари ўтказилиши белгиланган.
Изоҳ (0)